Калуга хоорайга таарымчалыг хоорай хүрээлеңин тургузар шылгараңгай төлевилелдерни илереткен улуг шуулган болуп эрткен. Аңаа федералдыг ведомстволарның удуртукчулары, губернаторлар болгаш муниципалитеттер баштыңнары киришкен.
Тыва Кызыл хоорайга «Тыва кавай», Шагаан-Арыг хоорайның Дружба кудумчузунуң кижи кылаштаар зоназын чаагайжыдар, Туран хоорайда Хамааты дайынының маадыры Сергей Кузьмич Кочетов аттыг кудумчуну хевир киирер үш төлевилелди таныштырган.
Туранның төп Кочетов кудумчузун эде чаартыр төлевилел чолаачыларга-даа, чадаг кижилерге-даа эптиг байдалды хевирлээр. Бо үеде ында садыглар чанында машина тургузар таарымчалыг черлер чок. Чаъс-чайык соонда кижи кылаштаар арга чок малгаш, а хадый бээрге, доозун көдүрлүп кээр, кудумчу чырыы, кижи кылаштаар орук чок. Кудумчунуң төнчүзүнде Марк Оюн аттыг Культура бажыңының баарында плиткаларны солуур үези келген.
Кудумчуну эде чаартыптарга, дыштанылга зоназы, рынок шөлү база Культура бажыңының шөлү аңгыланы бээр. Клубтуң баарынга машина база чадаг-терге тургузар черни, тускай техника шөлүн, дыштанып олурар черни кылыр. ДК-ның ханазында Эрес Байындының сиилбээни “Ажылчын биле колхозчунуң” база “Атлеттиң” чуруун чаартыр, ол ышкаш совет үениң плиталарын бетон плиталар-биле солуур.
Орукту дургаар чырыкты шөер, суг оруун тыртар, ыяш көвүрүглерни солуур. Садыгларның даштын септээр, чаа садыг точкаларын база одуругларын тудуп, чемненилге черин дериир, «Жернова» арт-объектини тургузар.
Төлевилелди Тываның Тудуг яамызының специалистери баштаан кожуун болгаш хоорай чагыргазы, аныяктар болгаш хөй-ниити лидерлери ажылдаан. Алдынай Байкара төлевилелдиң чуруун кылган. Кудумчуну 2025 чылда чаартып эгелээр.
А. МОНГУШ.
“Шын” №67 2024 чылдың сентябрь 4
