«Хоорайларывыс болгаш суурларывысты чаартып, амыдыраарынга таарымчалыг амгы үениң хүрээлеңин тургузуп тура, төөгүлүг черлерни кадагалап арттырары база чугула…» – деп, РФ-тиң Президентизи Владимир Путин чугаалаан.
2019 чылдан эгелээш Россияның девискээринге «Чурттаар оран-сава болгаш хоорай хүрээлеңи» национал төлевилел боттанып эгелээн. Ук төлевилелдиң иштинче «Чурттаарынга таарымчалыг хоорай хүрээлеңин хевирлээри» деп программа кирип турар. Бүгү Россияның регионнары чурттап турар черлерин ук программаның ачызында чаартып турар.
«Таарымчалыг хоорай хүрээлеңин тургузары» федералдыг төлевилелдиң кол сорулгазы – хоорай хүрээлеңиниң шынарын бедидери, чурттакчы чонга хоорай, суурларны таарымчалыг кылдыр кылыры, чурттаарынга таарымча чок хүрээлеңниг хоорайлар санын ийи катап эвээжедири, чаагайжыдылга ажылынче хамаатыларны киириштирери.
Ук төлевилелдиң деткимчези-биле Бии-Хем кожууннуң девискээринге ийи объектини чаагайжыдып эгелээн. Ол дээрге Аржаан сумузунда «Ада-чурттуң Улуг дайынының киржикчилеринге тураскаал 1941– 1945чч» болгаш Уюк сумузунда Н.Г. Крюков биле С.К. Беспалов баштайгы большевиктерге тураскааткан дыштанылга шөлүнүң чаагайжыдылгазы болуп турар.
Ийи объектини 2023 чылда бии-хемчилер боттары онлайн-бадылаашкын дузазы-биле шилээн турган.
Бо хүнде тудугжулар тураскаалдарның турар черин дескилээш, брусчаткаларын чадарынга белеткеп эгелээн. Удавас ажыл доостур. Ук сумуларга чоннуң дыштаныр чери бар апаар.
Кажан шагда октаттынган турган дыштаныр черлер удавас чаарттынып, чараш шинчи кирип кээр дээрзи билдингир. Тус черниң чурттакчы чонунга чурттаарынга таарымчалыг хоорай хүрээлеңи тургустунганы ол.
Бии-Хем кожууннуң чагыргазының медээлеринден алган.
"Шын" №54 2024 чылдың июль 20
