Школачы уйнуум-биле Кызыл хоорайның оң талакы дачазында чурттап турар мен. 2025 чылдың октябрь 14-те кежээкиниң 18 шакта уйнуум школага өөренгеш, бажыңче кирип ора, «Кырган-авай, муңгарап тур мен» — деп. Чылдагаанын көгүдүп айтырарымга, «106 дугаарлыг автобуска 64 рубль төледим. Автобусче кирип келгеш-ле, 32 рубльди кондукторга төлепкен мен. Элээн болганда ол кондуктор «Орууң өртээн төле!» дээш алгыра берди. Кирип келгеш-ле, орук өртээн төлептим дээримге-даа, мегелеве, төле дээш автобус долдур хөй улус аразынга алгырып туруп берди. Төлепкен мен дээш ийи дугаар чугаалаарымга-даа алгырып туруп бээрге, чадап кааш, база катап 32 рубльди төледим» — деп муңгарап чугаалады.
Автобуска олурган школачыларга билет бербес, ооң соонда катап база негээр кондуктор тыптып келген. Бир эвес орук өртээн төлептерге-ле, ол-ла дораан чегин берген турган болза, ындыг чүүл турбас-ла-дыр. Бөдүүн чонну ынчаар дорамчылап турарга, хомуданчыг-дыр. Моон соңгаар өске улустуң ажы-төлүн куду көрбезин, биледин үзүп берип турзун дээш, бо чагааны бижидим.
/ Мая ДЕЧИН, Кызыл хоорайның чурттакчызы, ТР-ниң алдарлыг ажылдакчызы.
Чурукту интернеттен хоолгалаан.
“Шын” №42 2025 чылдың октябрь 30