Россияныӊ Стратегиялыг хөгжүлде болгаш национал төлевилелдер талазы-биле Чөвүлел хуралы болуп турган.
Президент Владимир Путин чурттуӊ хөгжүлдезиниӊ национал сорулгаларын делгемчидип, планнаашкынны 2036 чылга чедир тургузар, амыдыраар акша-төгерии чедишпес ядыы чоруктуӊ берге айтырыын шиитпирлээриниӊ бир аргазы хамаатыларныӊ акша орулгазын көвүдедири дээрзин чугаалаан.
Үстүнде айыткан Чөвүлел хуралыныӊ дугайында Тываныӊ Баштыӊы Владислав Ховалыг дараазында кол чүүлдерни демдеглээн.
«Тыва 12 национал төлевилелдерде киржип турар. Оларны 5 чыл дургузунда амыдыралга боттандырганы республиканыӊ социал-экономиктиг хөгжүлдезинге улуг идигни берген. Чоннуӊ саныныӊ ала-чайгаар көвүдээринге, Владимир Владимировичиниӊ бот-идепкейжи саналы-биле хөй ажы-төлдүг өг-бүлелерге социал деткимчени көргүзүп эгелээни салдарлыг болган, эвээш санныг чоннарга ол дыка чугула болур. «Демография» национал төлевилел-биле 50 социал объектилерни тудуп чаартып кылган. Бөгүн Президент Стратегиялыг хөгжүлде болгаш национал төлевилелдер талазы-биле Чөвүлел хуралынга дес-дараалашкак медээлерни берген. Ол чүүлдерниӊ чамдыызын маӊаа демдеглээйн:
Бирээде, чаарттынган төлевилелдерниӊ үе-хуусаазын 2036 чылга чедир кылыр. Тус-тус черлерге стратегиялыг ажылдарны чорудары негеттинип келген. Ол дээрге шуут чаа кыйгырыг болгаш республиканы хөгжүдериниӊ аргалары-дыр.
Ийиде, Россияныӊ оруктарын септээр ажылдар шалыпкын чоруп турар. Бис шыдап чоруп турар бис. Келир чылдыӊ лимиттери, ооӊ иштинде «Айыыл чок шынарлыг оруктар» национал төлевилел талазы-биле лимиттери шиӊгээттинген. Бо сөөлгү чылдарда Тываныӊ барык 170 км херии автооруктарыныӊ 86 участоктарын экижиткен.
Үште, квалификациялыг кадрларны камнап, оларга эки акша-шалыӊны тургузары. Тывада боттандырып турар инвестициялыг төлевилелдерге болгаш боттандырарын планнап турар төлевилелдерге бистиӊ специалистеривис ажылдаар ужурлуг. Оларны кол башкарыкчы эрге-чагырга белеткээр ужурлуг. Удавас республиканыӊ Дээди Хуралынга (парламентиге) Айыткалдыӊ кызыгаары-биле чогуур даалганы хевирлеп тургузар мен» – деп, регионнуӊ удуртукчузу В. Ховалыг тайылбырлап бижээн.
Р. ДЕМЧИК белеткээн.
Чурукту интернеттен алган.
“Шын” №98 2023 чылдың декабрь 23