Херээжен кижиниң буян-кежиин доктаадып, өг-бүлезин быжыктырып ап чораан чажыттары:
Чажын дырап тургаш, дыргак дузазы-биле бүдүн хүн дургузунда чыглы берген багай кара күштерден, медээлерден адырып дырап тур мен деп, сүзүглээр. Кыс кижиниң энергиязы чажының дүгүнде дээр болгай, ылаңгыя узун чаштыг херээжен кижиниң күжү улуг боор.
Мага-бодун чунуп тургаш, каастанып чараштанып-даа тургаш, эки чараш чүүлдер бодап бодун чарашсынып, херээжен чараш бургандан күш ап тур мен деп, сүзүктээрге, Венера планетазындан чайгаар күш тыртып турар боор. Кезээде чараш, кадык боор мен деп, сүзүктеп турар болза эки.
Бир эвес чоок кижилериңер аарый берген таварылгада, эм оъттардан азы чимистерден ханды белеткеп берип турар үеде, эң эки чылыг, чымчак сөстерни чүрээңерден чугаалап, адыштарыңардан эң дээди чуртталганың херелдери чайынналып, аараан кижиге дүрген сегииринге эм-дом болуп, сүүзүннүг чулук болзун деп сүзүктээрге, ол кижиниң экирип сегииринге улуг дуза болур.
Чем кылыры дээрге, база бир улуг медитация болур ужурлуг. Чүге дизе чем дузазы-биле күш-деңгел ап турар болгай.
Аъш-чем белеткеп тургаш, кылыктанып, хорадап, чалгаарап база далажып тургаш кылбас. Улуг аарып тургаш, чем кылырын шеглээр болза эки. Херээжен кижи чемни хөөн, сонуургал чок кылырга, амдан чок боор. Бир эвес чемни далашпайн, сеткили-биле, чырык бодалдарлыг база сонуургап, янзы-бүрү кылдыр белеткээрге, чемзиг, амданныг, хоолулуг болур, база өг-бүлези быжыг болур. Далган тудуп тургаш база өг-бүлем демниг, найыралдыг болзун деп сүзүглээр.
Бажың иштин арыглап- аштап тургаш, бодалыңар дузазы-биле шупту багай чүүлдерден, аарыг-аржыктан, кара күштерден адырлып, арыгланып, хир-биле катай аштап чуп тур мен деп бодаарга, багай чүүлдер чайгаар эстип, бажыңыңар ишти чырып, хуулгаазын өөрүшкү-биле дола бээр. Бажыңны лаа күжү-биле арыглап, айдыс-артыш кыпсып, агаарладыр. Бажыңга чечектер өстүрерге, тергиин эки болур. Шак-ла мынчаар бажыңны арыг-силиг тударга, 5 олуттуң күчү күжүн, камгалалын алыр.
Бо бүгү чүүлдерни сеткилинден кылып, сүзүктеп тургаш, ооң-биле чергелештир угаан-медерел, сагыш-сеткилин кезээде арыг, чырык, бүдүштүг тудары албан.
Интернеттен хоолгалаан.
“Шын” №72 2023 чылдың сентябрь 23