Март 15–17 хүннеринде «Чурттаар оран-сава болгаш хоорай хүрээлеңи» национал төлевилелдиң волонтёрларының ачызында 2025 чылда девискээр чаагайжыдылгазы дээш онлайн-бадылаашкынга чурттуң 30 регионунуң чурттакчылары киришкен.
Волонтёрларның ачызында чурттакчы чон девискээр чаагайжыдылгазы дээш онлайн-бадылаашкын дугайында билип ап, боттарының үнүн берип турар. Чылдан чылче чурттаарынга таарымчалыг хоорай хүрээлеңин хевирлээр ажылче дыка хөй чурттакчы чонну хаара тудуп турар.
«Шын» солуннуң эрткен үндүрүлгезинде Бай-Тайга кожуунга чаагайжыдар девискээрлерни чырыткан болгай бис. Бо удаада март 20-ниң көргүзүү-биле, эң-не идепкейлиг болган ыраккы Мөңгүн-Тайга кожуун биле эң-не эвээш сан алган Ак-Довурак хоорайны таныштырар-дыр бис.
Бо чылын Мөңгүн-Тайга кожуун чаагайжыдылгаже 2 төлевилелди киирген — кожуун төвү Мугур-Аксында стадионну чаартыр база аңаа спортчу шөлдү тургузар.
Кошкар-оол кудумчузунда стадионнуң чаартылгазында долгандыр херимнээри болгаш чырыдылгазы кирип турар. Март 25-тиң көргүзүү-биле мугур-аксыжыларның хөй кезии бо төлевилел дээш 1643 кижи соңгаан.
Ол-ла Мугур-Аксынга спортчу шөл дээш 19-ла кижи үнүн берген. Спортчу шөлдүң девискээринге баскетбол ойнаар шөл, трибуна база спортчуларга болгаш аарыкчыларга сандайлар, долгандыр херимнээри, чырыдары база бок октаар урналар тургузары көрдүнген.
Ак-Довурак хоорайның чурттакчылары бо чылын 3 девискээрни чаагайжыдар дээш онлайн-бадылаашкында киржип турар.
Хоорай парыгын чаагайжыдар бирги төлевилел дээш ак-довуракчылар 188 кижи соңгаан. Төлевилел езугаар парктың девискээрин брусчаткалар-биле шывар, биче архитектурлуг хевирлерни тургузары көрдүнген.
Ак-Довурактың чурттакчыларының улуг кезии «Ат-алдар аллеязының» чаагайжыдылгазынче хөй кижи үнүн берген — 1217 кижи бадылаан. Ук девискээрни херимнеп, чырыдарындан аңгыда, ол черни ногаанчыдар, тускай суггарылга системазын аңаа тургузар. Аңаа тураскаал тургузар ажылдар кол черни ээлээр.
2025 чылда хоорайның чагырга чериниң девискээринде сесерликти база чаагайжыдары көрдүнген. Ол дээш 267 кижи соңгаан. Аңаа база-ла сандайлар, бок октаар урналар, светильниктер тургузар. Ол ышкаш аңаа спортчу болгаш уруглар ойнаар шөлдер тургузарын база планнап турар.
Бо дээрге чүгле март 25-ке чедир көргүзүглер-дир. Онлайн-бадылаашкынның доостурунга чедир ам-даа бир ай бар (апрель 30-ге чедир). Ынчангаш төрээн сууруңар, хоорайыңар ам-даа чараш, чурттаарынга таарымчалыг болзун деп бодаар болзуңарза, онлайн-бадылаашкынга киржиңер. Онлайн-бадылаашкынга киржирде, https://17.gorodsreda.ru онлайн-платформаже киргеш, төлевилелдер-биле таныжып, таарышканы объект дээш бодунуң үнүн бээр. Азы болза, хөй-ниити черлеринде ажылдап турар волонтерларның дузазын база ап болур. Бадылаашкынга 14 хар четкен элээдилер база киржип болур. Бир кижи 2025 чылда чаагайжыдар бир төлевилел дээш үнүн кадар.
Алдынай СОЯН.
Чуруктарны интернеттен алган.
"Шын" №23 2024 чылдың март 27.
