Тываныӊ Чазаа автономнуг өрт медээчизин хөй ажы-төлдүг азы амыдыралы чегей өг-бүлелерниӊ чурттап турар бажыӊынга халас кылып бээриниӊ чурумун бадылаан.
Өрт үезинде кижилерниӊ өлүрүн азы кемдээрин баш бурунгаар болдурбазы-биле, ук чурумну регионнуӊ Күш-ажыл болгаш социал политика яамызы ажылдап кылган. Социал хандырылганы үш болгаш оон хөй уругларлыг ада-ие болгаш инвалид уруглуг ада-ие ап болур. Оон аӊгыда, төрээн болгаш азыранды уруг-дарыын өстүрүп кижизидип турар, республикада амыдыраарынга көрдүнген доктааттынган акша-хөреӊгиниӊ кудуку хемчээлинден эвээш орулгалыг өг-бүлелер ындыг хандырылганы ап болур. Печка одаар бажыӊда чурттап турар шак ындыг өг-бүлелерге өрт медээчизин халас кылып бээр.
Социал албан чери өрт медээчизин кылыр талазы-биле ажылды 2018 чылдан тура өртчүлер-биле кады кылып турар. Айыылдыг бөлүкке хамааржыр бир муӊ беш чүс хире өг-бүлелерге өрт айыылынга удур херекселдерни халас кылып берип турар дээрзин Күш-ажыл болгаш социал политика яамызыныӊ оралакчы сайыды Шеӊне Лапчаа тайылбырлаан.
Бо чылын 1018 өг-бүлеге өрт медээчизи кылыр акша-хөреӊгини регионнуӊ Баштыӊы Владислав Ховалыгныӊ даалгазы-биле үндүрүп берген. Өрт айыылынга удур хемчегниӊ тускай дериг-херекселин кылдырар улустуӊ санын улаштыр көвүдедир.
Өрт медээчизи кылыр ужурлуг бажыӊнарны Өг-бүлеге болгаш уругларга социал дуза төптериниӊ специалистери тодараткан. Ук дүрүмнү хүлээп алырыныӊ мурнунда, ооӊ негелделерин чаа-ла ажылдап кылып турда, олар учетта турар өг-бүлелерниӊ бажыӊ-балгадында байдалын көрүп тургаш, шилип алганнар.
Ук дүрүмнү ам бадылаан болганда, социал хандырылга алыр өг-бүле билдириишкин бижиир. Тускай комиссия билдириишкинни сайгарып көргеш, өрт медээчизин халас кылып бээриниӊ дугайында шиитпирлээр.
Билдириишкинни болгаш өг-бүлениӊ эрге-байдалын бадыткаар документилерин социал камгалал төптери хүлээп алгаш, сайгарып көөр.
Өрт медээчизи от-көстүӊ айыыл-халавындан камгалаар эӊ-не чедиишкинниг аргаларныӊ бирээзи болуп турар. Чижээ, Красноярск крайга 2022 чылда өрт медээчизи деп херекселдиӊ ачызында 29 кижини, ооӊ иштинде чеди бичии уругну камгалаан. Россияныӊ Онза байдалдар яамызыныӊ эскперттериниӊ шинчилелдеринге даянып, өг-бүлениӊ чурттап турар бажыӊынга өрт медээчизин кылырын саналдаан.
ТР-ниӊ Чазааныӊ медээлеринден Р.Демчик белеткээн.