Республикада уругларның дыштанылга лагерьлериниң бирги ээлчээ дооступ, ийи дугаарлары ажыттынып эгелээн. Бо хүннерде Барыын-Хемчик кожуунда тайга эдээнде кайгамчык чараш черде «Шолбан-Ак» лагериниң бирги ээлчээ доозулган. Аңаа чайның бирги айында республиканың аңгы-аңгы булуңнарындан 60 уруг дыштанган.
Оолдар, уругларга Россияның Чырыдыышкын яамызының ажылдап кылган кижизидилге ажылының чаңгыс аай программазының иштинге янзы-бүрү идепкейлиг хемчеглерни эрттирген. Олар турисчи поход үезинде бодун канчаар шын алдынарын өөренип алганнар, камгалакчыларның ролюн-даа күүсеткеннер, ол ышкаш бир хүн бизнесменнер-даа болганнар. Дыштаныкчыларга бир дугаар хүннү «Баштайгыларның шимчээшкини» регионалдыг салбырның идепкейжилери организастаан.
Оолдар, уруглар чаа эш-өөрнү тып, отрядтарының вожатыйлары болгаш кижизидикчи башкыларынга чаңчыгып, а кол-ла чүүл — команда-биле ажылдаарын билип, бодалдарын болгаш сеткил-сагыжын илередип, чогаадыкчы база спортчу салым-чаяанныын көргүзүп шыдааннар.
Июль 2-де «Шолбан-Ак» лагериниң ийиги ээлчээнге дыштаныры-биле, 60 уруг келген. Олар июль 23-ке чедир дыштанырлар.
Регионнуң Өөредилге яамызының медээзи-биле алырга, республиканың хоорайдан дашкаар 22 лагериниң 20-зи ийиги ээлчегге ажылдаар. Аңаа ниитизи-биле 1654 уруг күш-шыдал кирип дыштанырлар. «Шолбан-Актан» өске, июль 3-те Тожу кожуунда «Родничок» база ийиги ээлчээн ажыткан. Ол база июль 23-ке чедир ажылдаар. Ол ышкаш Каа-Хемниң «Бельбей» лагеринде 70 школачы неделя бурунгаар дыштанып эгелээн. Ол лагерьниң ээлчээ июнь 28-тен июль 18-ке чедир үргүлчүлээр.
Ийиги ээлчег 96 хүндүскү лагерьлерде база эгелээн. Ында 4532 уругнуң дыштанылгазын организастап турар. Июль айда 145 ындыг лагерь ажылдаар. Июль 5-те Бай-Тайга кожуунда майгыннарлыг лагерьни ажыткан. Шак-ла ындыг «Азас» лагери Тожу кожуунга июль 10-да ажылын эгелээр.
Тываның Өөредилге яамызының медээзи-биле алырга, бирги ээлчегде республикага 133 хүндүскү лагерь ажылдаан, аңаа 6700 уруг дыштанган. А 1700 уругну хоорайдан дашкаар 21 кадыкшылга лагеринге хаара туткан.
Уругларның айыыл чок чоруунче онза кичээнгейни угландырганын база демдеглээр апаар. Республиканың Баштыңы хоруглуг черлерде уруглар дыштаныр объектилерни тодараткаш хаарын дааскан. Эрге-чагырга органнарының болгаш албан-дужаалдыг кижилерниң ажыл-чорудулгазының чаа регламентизин тургускан. Ол дээрге уругларның дыштаныр объектилериниң хайгааралын күрүне албан черлери күштелдирер база ындыг албан черлериниң ээзиниң хоойлу мурнунга харыысалгазын улгаттырар.
Тыва Республиканың Өөредилге яамызының сайтызында лагерьлер даңзызының база республиканың девискээринде турар чамдык организацияларга санитар-эпидемиологтуг доктаалдар дугайында медээни тып ап болур.
А. СОЯН белеткээн.
Чуруктарны "Шолбан-Ак" лагериниң социал четкиде арнындан алган.
“Шын” №26 2025 чылдың июль 10
