Республика парламентизиниң чаа составының чаа соңгуткан депутаттары дараазында четвергте бирги хуралын эрттирер. Сентябрь 26-да Тыва Республиканың Баштыңының чогуур чарлыын эрге-хоойлу информациязының албан езунуң Интернет-порталында, ол ышкаш республика Чазааның албан езунуң сайтызында парлаан.
Тываның Баштыңы Владислав Ховалыг Тываның Үндезин хоойлузу езугаар, чаа соңгуткан Тыва Республиканың Дээди Хуралының (парламентизиниң) дөрткү чыыжының бирги организастыг хуралы 2024 чылдың сентябрь 26-да чыырын бодунуң Чарлыында доктааткан.
Улусчу депутаттар элээн каш айтырыгларны сайгарар, амдыызында ону хевирлээри чоруп турар. Ындыг болзажок сессияның бирги хуралында депутаттар организастыг айтырыгларны шиитпирлээр.
Сентябрь 8-те, Чаңгыс аай бадылаашкын хүнүнде, Дээди Хуралдың дөрткү чыыжынче соңгулдалар болуп эрткенин сагындыраал. Шупту 32 депутатты соңгаан. Тываның төөгүзүнде бир-ле дугаар парламент составынче дөрт партия эрткен. «Чаңгыс демниг Россия» – 25, КПРФ — 2, ЛДПР биле «Чаа кижилер» — 1–1 олуттарны алган. Боттарын идип үндүрген Роберт Доржу, Буян Биче-оол база Саян Ондар үш мандатты алганнар.
Тываның Баштыңы Владислав Ховалыг хөй партийжи парламент, соңгукчуларның политиктиг көрүжүн болгаш сонуургалдарын илереткен демократия барын бадыткаан деп демдеглээн. «Дыка хөй төлевилелдер дээш кады ажылдап, демнежип, күжениишкиннер каттыштырар херек. Тываның хөй партийжи чаа парламентизи ындыг хөөн-биле ажылдаарынга бүзүрээр мен» – деп, Владислав Ховалыг бодунуң блогунда республиканың Соңгулда комиссиязы соңгулдаларының төнчү түңнелдерин чарлаптарга, демдеглээн.
А.МОНГУШ.
Чурукту интернет четкизинден хоолгалаан.
«Шын» №72 2024 чылдың сентябрь 21
