2025 – 2026 өөредилге чылында бирги классче өөренип кирер оолдар, уругларны албан-езузу-биле апрель 1-де 8.00 шакта школага бижидер. Ажы-төлүн школаже киирер ада-иелер дүвүреп эгелээн. Чүгле киир бижидилгелиг адрезиниң девискээринде школаже ажы-төлүн өөредип киирер ужурлуг деп чурум бар. Ынчангаш бо хонуктарда ада-иелерни киир бижидилге айтырыы дүвүредип эгелээн.
Кайы-бир бажыңче киир бижидерде, ачы-дуза порталынче киргеш, «Услуги» деп кнопканы базар, ооң соонда «Регистрация паспорта», дараазында «Регистрация по месту жительства или пребывание» деп бижикти базыптар. Госуслугиниң айытканын езугаар долдургаш, билдириишкинни чорудар. Бажыңның ээлеринге, чөпшээрээр, чөпшээревес дугайында медээ чеде бээр. Бажыңның ээлери чөпшээрел берген соонда, билдириишкинге болгаш документилерге хамаарыштыр хыналданы ИХЯ чорудар. Ук ажыл доозулган дугайында медээ силерниң ачы-дуза порталында кабинедиңерге чедип келир. Бодуңарга эптиг үени шилээш, бижидип алыр силер. Баш удур бижидип алган-даа болза, паспорт столунга эртежик чеде бергеш, хууда кабинедиңерде келген код-биле талон алырын утпаңар.
Ачы-дуза порталын таварыштыр чөпшээрелди берген болган соонда, бижидип алган хүнүңерде бажың ээлери чокка баргаш, киир бижидилгени кылдырып алыр силер.
Бир эвес ачы-дуза порталындан билдириишкин киирбээн болза, ооң мурнунда дег, бажыңның ээлери оран-савага хамааржыр документилерин доозазын ап алгаш, паспорт столунга баргаш, билдириишкин бижээш, киир бижидер.
Авазы кайда киир бижиттингенил, назы четпээн ажы-төлүнге авазы-биле кады киир бижидилгени кылдырар ужурлуг. Назы четпээн ажы-төлүн бодунуң киир бижидилгелиг адрезинче киир бижидери-биле билдириишкинни авазы боду бижээш, атты салыр. Авазының чөпшээрели азы күзели чокка назы четпээн уругнуң киир бижидилгезин өскертип болбас.
Бирги классчыларны школаже киир бижидерде, 2025 чылдың апрель 1-ден июнь 30-ге чедир ачы-дуза порталын таварыштыр билдириишкинни чорудар. Ооң соонда июль 6-дан сентябрь 5-ке чедир хүлээр. Апрель 1-ге чедир 5 хонук арткан.
А. ОНДАР.
Чурукту интернеттен алган.
«Шын» №11 2025 чылдың март 27