Декабрь 20-де Аныяктар өргээзинге эки турачылар шимчээшкининиң болгаш коммерциялыг эвес организацияларның сайзыралынга хамаарышкан Тываның Чазааның чанында чөвүлел хуралы болуп эрткен.
Ук хуралга коммерциялыг эвес организацияларның болгаш эки турачыларның чыл дургузунда кылган ажылын түңневишаан, келир чылгы салдынган планнары-биле база таныштырган.
Келир чылын “Бис кады бис” деп федералдыг штабтың Тывада салбыры 5 чылдаар. Эки турачылар организациязының ниитилелге чедирип турар ачы-буяны эгээртинмес хөй. Чижээ, 2020 чылда ковид нептереп турда, “Бис кады бис” деп штабтың кежигүннери аарыг кижилерниң болгаш энелерниң бажыңнарын кезип, янзы-бүрү дузаны чедирип турганнар. Оларның ажыл-чорудулгазын федералдыг төпте бедик үнелеп турар. Тываның салбыры Россияның шупту регионнарының аразында тергиин ажылы дээш 3-кү одуругда турар.
“Ачы-буян чедиргеш, ковидтен аарываан эки турачы тыппас силер. Мен бодумнуң амы-хуумда ийи катап аарыдым. Ындыг турбуже, эмненип алгаш, катап база буянныг үүлевис уламчылап кириптер бис. Дуза чугула херек кижилерниң саны эңмежок. Тускай шериг операциязы эгелей бээрге, бистиң штабтың кежигүннери дайынчыларывыстың чоок кижилеринге дузалажып кирипкен. Ылаңгыя чер бажыңга өг-бүлениң эр ээзи чокта херээжен чонга дуза чугула херек болгай. Бо хүнге чедир муң-муң кижилерге сеткиливис ханызындан бажыңының иштики болгаш даштыкы ажылдарын кылчып берген бис” — деп, “Бис кады бис” деп штабтың Тывада салбырының координатору Артыш Моңгуш демдеглээн.
Бүгү-россияның регионнарында “Тиилелгениң эки турачылары” деп организацияның салбырлары ажыттынып келген. Олар база ТШО маадырларынга болгаш оларның чоок кижилеринге улуг дузаны чедирип турарлар. Ам келир чылын ук организацияның волонтёрларынга база улуг даалганы дааскан. Ада-чурттуң Улуг дайынынга Тиилелгениң 80 чылдаан байырлалдарынга регионнуң эки турачылар төптерин хаара тударын болгаш аңаа хамаарыштыр ажылды шыңгыы болгаш шынарлыг чорудар. Ниитизи-биле чылдың дургузунда 40 ажыг хемчеглерни эрттирери көрдүнген: чыскаалдар, акциялар болгаш сактыышкын шактары планаттынган.
“Амгы үеде Ада-чурттуң Улуг дайынынга тураскааткан хемчеглер чугула. Чоннуң патриотчу хөөнүн көдүрер болгаш төөгүзүнге чоргааралын база оттурар. Ол дээрге бистиң дидим дайынчыларывыска хүндүткелдиң демдээ-дир” — деп, Тываның аныяктар херектериниң талазы-биле сайыды Субудай Оюн демдеглээн.
Оон аңгыда, коммерциялыг эвес организацияларның ТШО-да дайынчыларга ачы-дузазы эң-не улуг деп хуралга демдеглээн. Олар гуманитарлыг болгаш оон-даа өске чугула дузаны маадырларга чедирип турар. Ынчангаш ук организацияларны Тывага ам-даа сайзырадыры болгаш хандырары кол айтырыг. Янзы-бүрү грантыларга болгаш мөөрейлерге киржиринге болгаш тиилеп алырынга дузаны кадары чугула деп шиитпирге келгеннер.
Олча ОНДАР.
Буян Ооржактың тырттырган чуруу.
“Шын” №98 2024 чылдың декабрь 21
