Кызыл хоорайда Аныяктар өргээзинге «Бодуңга бүзүре» деп хөй-ниити шимчээшкининиң кежигүннери республиканың школаларының доозукчулары болгаш оларның ада-иелери-биле информастыг технологиялар (ИТ) дугайында чугааны чоруткан.
Эрткен чылын ук организация суурларда школачылар-биле ужуражылгаларны удаа-дараа чорудуп турган дугайында ИТ-волонтер Антон Тарханов дыңнаткан.
«Кожууннарда уруглар болгаш ада-иелер медицина, бизнес болгаш өөредилге дээн ышкаш янзы-бүрү шугумнарның ажылдакчылары-биле ужурашкан. Олар боттарының арга-дуржулгазын болгаш чедиишкининиң төөгүзүн олар-биле үлежип турган. Ук төлевилелдиң кол сорулгазы хөй-ниити шимчээшкининиң адындан илдең. Янзы-бүрү мергежилдерни шиңгээдип болурунуң, Тываның кожууннарында уруглар амгы үениң негелдезинге дүүштүр эртем-билигни чедип алырының дугайында тайылбырлап турар бис. Чедиишкиннер дугайында дыңнааш, уругларның хей-аъды көдүрлүп, бодунга бүзүрели оттуруп кээр. Ол ышкаш боттарының эчис сорулгазын амыдыралынга боттандырар идигни бээринге дузалажып турар бис» — деп, ИТ-волонтер демдеглээн.
Бо удаа хемчег үезинде ИТ-волонтерлар информастыг технологиялар шугумунга өөренип алыр аргаларны болгаш ол талазы-биле кандыг өөредилге черлеринче кирип болурун уругларга таныштырган.
Технологияларның дүрген сайзырап турары-биле чүгле Тывада эвес, бүгү делегейде ИТ мергежилдиг специалистерниң чедишпейн турары билдингир.
— Информастыг технологиялар дугайында чугаа чоруп турда, кандыг-ла-бир билдинмес программистер дугайында эвес, а тодаргай мергежилдерни чугаалап турар бис. Информастыг технологиялар адырынга янзы-бүрү мергежилдерни шиңгээдип ап болур. Чүгле математика, информатика эвес, төлевилелдер удуртукчулары, дизайнер, чурукчу, сценаристер, медээлер аналитиктери дээн ышкаш мергежилдерге өөренип ап болур. Амгы үеде бо мергежилдерниң специалистери чугула хереглеттинип турар – деп, волонтер медеглээн.
«Бодуңга бүзүре» деп хөй-ниити шимчээшкин ийи чыл дургузунда социал төлевилелдерни боттандырып, янзы-бүрү мергежилдерниң төлээлери-биле кожууннарже үнүүшкүннерни кылып, аныяк-өскен-биле ужуражылгаларны удаа-дараа чорудуп турар дугайында демдеглээли.
Алиса ДОНГАК.
Ада ТЮЛЮШТУҢ тырттырган чуруу.
"Шын" №51, 2023 чылдың июль 12.