От-көзүн өжүрбээн серемчилел чок кижиниӊ хайы-биле Тожуда Адыр-Кежигниӊ 47 гектар арга-арыы өрттенген. Республиканыӊ арга-арыг фондузунга ол 372 муӊ рубль когаралды чедирген.
Май 16-да республикада тос аӊгы черде 3259,1 гектар арга-эзим өрттенип турарын медеглээн. Ынчангаш өрт өжүреринге Россияныӊ ОБЯ-ныӊ авиа отрядын болгаш Ми-8 вертоледун келдирген.
Республиканыӊ Бойдус яамызының дыӊнатканы-биле алырга, 275,1 гектар черде беш аӊгы өрттү, ооӊ иштинде «Убса-Нур ыйгылаажы» заповедникте улуг өрттерни өжүрген, ийи черде өрттү өскээр дамчывас кылдыр бүзээлээш, өжүрүп эгелей берген.
Арга-эзимнерде өөскүп кыпкан өрт халавын өжүрери-биле 334 кижини, 32 машина-техниканы хаара туткан.
Тываныӊ Чазааныӊ 278 дугаарлыг доктаалы-биле республикада өртке удур онза чурумну июнь 5-ке чедир узадып каан. Ынчангаш дараазында негелделерни албан сагыыр ужурлуг бис.
! Арга-арыгже чадаг-даа, транспорт, автомашиналыг-даа кирип болбас.
! Бойдустуӊ арыг черлеринге агаарлап чорааш, аъш-чем хайындырып, шашлык быжырып, одагланып болбас.
! Одар-белчиирлерге, хову-шөлдерге кургаг сиген өрттетпес.
! Бок-сүрээ өрттедип болбас.
Өрт халавындан суурларны, улустуӊ хуу өнчү-хөреӊгизин камгалаар, өрт айыылын чавырылдырар, арга-эзимнерге, хову-шөлдерге улуг өрттерни база техногенниг өрттерни болдурбас сорулга-биле онза чурумну узадып турар.
Тываныӊ ОБЯ-ныӊ Кол Эргелелиниӊ медээлери-биле Р.Демчик белеткээн.