Бөгүн, апрель 28-тиң хүнүнде, Чөөн-Хемчик кожууннуң девискээринде, Бора-Булак ховузунда чылдың болур чүгүрүк малдар чарыжы болуп турар.
Республика чергелиг аът чарыжы эгезин салгандан бээр 2023 чылда таптыг-ла 30 чылдың нүүрүн көрүп турар. Ооң мурнунда шилчип чоруур кубокту алган өске кожууннар ээлчег езугаар аът чарыжын организастап эрттирип турган. Бо юбилейлиг чылдың байырлалын Чөөн-Хемчик чагыргазы эрттирер деп хүлээнген.
Юбилейлиг чыл болганда, чүгле чүгүрүк малдар чарыжы эвес, а тыва улустуң үш оюнунуң ийизи боор — тыва мөгелерниң хүрежин болгаш ча адар адаан-мөөрейин республика чергелиг кылдыр организастап турарлары бо.
Чүгүрүк малдарның баштайгы салыы эртенгиниң 8 шакта үнүпкен. Финишче бир-ле дугаарында Улуг-Хем кожууннуң бора малы халып кирип келген.Ниитизи-биле беш салыг көрдүнген. Салыглар улай-улай кээп эгелей берген. Ооң-биле чергелештир ча адар адаан-мөөрей база Бора-Булак ховузунда болуп эгелээн. А тыва хүреш Чадаана хоорайның стадионунга болур. Удавас каш-ла минуталар болгаш мөгелер ачыр-дачыр тутчуп кириптер.
Байырлалда болган маргылдааларның түңнелдерин "Шын" солуннуң дараазында үндүрүлгезинден көрүп болур.
Айдың ОНДАР.
Буян ООРЖАКТЫҢ тырттырган чуруктары
