Март 1-де “БТК Бөлүктүң” даараныр фабриказынга ажылдаар олуттарже кирери-биле чугаалажыышкыннар болуп эрткен. Ниитизи-биле даараныр дериг-херекселдерге ажылдаар чарлаттынган 50 олутче 43 кижи чагыгны киирген. Оларның 39-у дугурушкан хүнде чедип келгеннер.
Келген кижи бүрүзүнүң даараныр үлетпүр машиназынга ажылдап билирин хынаан. Түңнелинде, 18 кижини бирги болгаш ийиги цехтерже ажылдаары-биле чоруткан. Ажыл дилекчилериниң 17-зи өөренип алгаш, улаштыр ажылдаар кылдыр кирген. Кордакчыларның бирээзи бодунуң мергежилин тергиин эки көргүскени дээш, даараныр дериг-херексел оператору кылдыр ажылдай берген. 11 кижини политехниктиг техникумнуң баазазынга өөренип алгаш, фабрикага ажылдап чедип келирин манаар болган.
Шылгалданы эрте берген 18 кижини март 4-тен эгелеп ажылче бүрүткээн. Политехниктиг техникумга курстар апрель айдан эгелээр. Республиканың чонну ажылга хаара тудар кады ажылдажылга программазы-биле ук хамаатылар курстарны төлевир чокка эртер. Төлевир чок өөренирде, Чонну ажылга хаара тудар төптүң учёдунга туруп алыр херек. Оон аңгыда, бүдүрүлгеже ажылдап кирип алган эвээш хөреңгилиг хамаатыларга “Ажыл дилээри” деп угланыышкын-биле социал керээни база чарар. Баштайгы 3 ай дургузунда олар шалыңының кырындан 17013 рубльди база алыр.
Бистиң корр.
Чуруктарны интернет четкизинден алган.
«Шын» №17 2024 чылдың март 6
