Федералдыг бюджеттен үндүрүп берген 1,5 млрд. рубльдиң 26,3 сая рубли Тыва Республиканың девискээринге “112” системаны тургузарынга база ону сайзыраңгайжыдарынга көрдүнген (дериг-херекселди садып алыры, эптеп-чыыр ажылдарны чорудары).
Тыва Республиканың девискээринде «112» система шенелде чуруму ёзугаар ажылдап турар.
2021 чылда Хамааты камгалалының болгаш Онза байдалдарның албаны республиканың девискээринге «112» системаны тургузарын доозуп, ону үлетпүр ажыглалынче киирген.
Система чеже-даа шенелде чурумунга ажылдап турза, ол регионнуң чурттакчыларындан база ооң аалчыларындан божуу-далаш дыңнадыгларны дүн-хүн чок хүлээп ап турган.
«112» дугаар-биле чурттакчылар дараазында дарый байдалдарда долгап болурлар:
• өрт камгалалынче;
• онза байдалдарда хөделир албаннарже (үрелиишкинни чайладыр база камгалал ажылдарын чорудар салбырларже);
• полицияже;
• дүрген эмчи дузазынче;
• газ четкизиниң үрелиишкиннер чайладыр албанынче;
• «Террорга удур» албанче.
Мооң мурнунда, 2017 чылда, “112” дугаарже чүгле найысылалдың чурттакчылары долгап болур турган болза, 2019 чылдан эгелеп база бир 10 муниципалитет ынаар долгап болур апарган, а 2021 чылда республиканың чурттакчы бүрүзү ооң кайы-даа девискээринге тургаш, дуза дилеп, долгаар аргалыг апарган.
«112» дугаар-биле келдиртилгени кандыг-даа соталыг азы турум шугумнуг телефондан силерниң четкиңерни хүлээп албайн турар девискээрден, саныңарда акшаңар чок-даа таварылгада, а ол ышкаш телефоннуң SIM-картазы чок-даа турда боттандырып болур.
Ооң-биле чергелештир, «112» деп дугаар мооң мурнунда турган дүрген харыы хөделиишкиннер албаннарының дугаарларын солувайн турарын сагындырып каары чугула. Оларже соталыг азы турум шугумнуг телефоннардан 01/101, 02/102, 03/103, 04/104 дугаарларже долгап болур.
А. ХЕРТЕК очулдурган.