Чеди-Хөл кожуунда Хову-Аксының хоочуннар бажың-интернадын езулуг-ла буянныг өргээ деп болур. Ооң дугайында биживестиң аргазы чок. Чүге дизе ында назы-хары улгаткан болгаш кадыының аайы-биле чурттап турар аныяк-даа кижилер бар, оларны ында дыка эки ажаап-тежээп, карактап турар.
Бажың-интернаттың удуртукчузу Долаана Александровна Дивии аныяк-даа болза, ажылынга кончуг харыысалгалыг аныяк специалист. Ооң оралакчызы Оюмаа Кызыл-ооловна Сотпа, улуг эмчи сестразы Чойган Ойнаар-ооловна Шыгжал, юрист Шеңне Михайловна Шыырап, социал ажылдакчы Чодураа Вячеславовна Ооржак база эмчи сестралары Людмила Кыргысовна, Рада Базыр-ооловна, Салбак Даржаевна олар шупту улуг назылыгларның болгаш инвалидтерниң кадыы дээш дүн-хүн чок, кончуг эки ажылдап турарлар. Санитаркалар Людмила Александровна, Аржааналар, Лилия Анай-ооловна шупту ажылынга бердинген, кончуг шалыпкын, эрес-кежээ кыстарны база демдеглээр апаар.
Удуртукчу Долаана Александровнаның ажылынга киирип турар үлүг-хуузу улуг, ол ажылчыннарынга-даа, интернат-бажыңның чурттакчыларынга-даа эвилең-ээлдек, эки хамаарылгалыг кижи.
Бистиң интернатка оюн-тоглаа, концерттер черле үзүлбес. Март 8 байырлалында херээжен чонга, февраль 23-те эр улузувуска, шуптувусту хемчээгеш, кончуг чараш чылыг чеңи-чоктарны даараткаш, белекке сөңнээни биске өөрүнчүг белек болган.
Мен бо бажың-интернатта 6 ай чурттааш, кайгап ханмайн тур мен. Интернаттың чурттакчылары шупту долу хандырылгада, аарыг кижилерни эмнеп турары шыырак, херек апарза, Кызыл хоорайже чедиргеш, эмнедип-даа турар. Бир өрээлде-ле 2 кижи чурттап турар. Өрээлдер арыг-силиг, чылыг-чырык, телевизор, соодукчу, хевис, чадыглар дээш бажыңда ышкаш херек чүүлдер шупту бар. Кежээлерде оюн-тоглаа, танцы-самны үргүлчү организастап турар. Ында чуртталга саглаңнаар, чүү дээр боор. Кижиниң ажы-төлү-даа болза ынчаар эки азырап шыдавас боор.
/ Людмила МОНГУШ,
Хову-Аксының хоочуннар бажың-интернадының чурттакчызы.
