Апрель 6-да ТР-ниң Дээди Хуралынга (парламентизинге), “Чаңгыс демниг Россия” партиязының баш удур бадылаашкынынга киржири-биле Россияның Маадыры, ТР-ниң аныяктар ажыл-херээниң талазы-биле сайыды Буян Кууларның бүрүткели болуп эрткен. Бадылаашкынның түңнели-биле РФ-тиң Федералдыг Хуралының тоску чыыжының Күрдумазының соңгулдаларынче партияны төлээлээр кандидат илереттинер.
Тускай шериг операциязының киржикчизи Буян Куулар 2024 чылдың апрель 3-те Президент Владимир Путинниң чарлыы-биле Россияның Маадыры деп атты ап, бедик күрүне шаңналынга төлептиг болган. Ук шаңналды аңаа камгалал сайыды Сергей Шойгу боду тывыскан. Баш удур соңгулдаларже ону идип үндүрери “Чаңгыс демниг Россия” партиязының кол сорулгазының бирээзи – чурттуң политиктиг амыдыралынче ТШО киржикчилерин идепкейлии-биле хаара тудары – күрүне Баштыңының даалгазынга бүрүнү-биле дүгжүп турар.
“Бөгүн бис баш удур бадылаашкынче кирген кандидаттың Күрүне Думазының соңгулдаларынче идип үндүреринге херек документилерин хүлээп алдывыс. Электроннуг хевирге болуп эрткен баш удур бадылаашкынның чурумун чогуур дүрүм ёзугаар доктааткан” – деп, “Чаңгыс демниг Россия” партиязының Тывада салбырының күүсекчи комитединиң удуртукчузунуң хүлээлгезин күүседип турар Шеңне Ховалыг дыңнаткан.
Амгы үеде 8 кандидат документилерин дужааган. Оларның 6-зы чаңгыс мандаттыг 37 дугаар соңгулда округунче кордакчылап турар. Оларның аразында башкылар, эмчилер база ТШО киржикчилери бар.
Баш удур бадылаашкынның чадалары: март 11-ден– апрель 30-ге чедир кандидаттарны идип үндүрер; май 15-ке чедир материалдарын парладыр; апрель 20-ден – май 19-ка чедир соңгукчуларны бүрүткээри.
Соңгулда хүннери: май 25-тен 31-ге чедир (pg.er.ru деп сайтыга электроннуг хевирге болур).
Бистиң корр.
“Шын” №13 2026 чылдың апрель 9
