Республиканың дыңнаары кошкак уругларның школа-интернадынга тускай шериг операциязында шериглерже чорудар камгаланыр четкилер аргыыр мастер-класс болган.
Ол хемчегге Улусчу фронтунуң база Россияда буддистер Ассамблеязының кежигүннери дээш элээн аалчылар келген. Олар школага камгаланыр четкилер аргыырынга херек ыяш каркасты болгаш янзы-бүрү өңнүг пөстерни эккелгеннер. Аңаа пөстерни канчаар кезерин, өңнерин канчаар таарыштыр шарыырын тайылбырлап өөреткеннер.
Школаның башкылары, кижизидикчилери, ажылчыннары база улуг класстың өөреникчилери буянныг ажылды шиңгээдип, өөренип алгаш кады кылганнар. Мастер-класска Бүгү-россияның дүлей уруглар ниитилелиниң каттыжыышкынының Тывада салбырының удуртукчузу Сайлык Семеновна Сарыглар баштаан кежигүннери база киришкен.
Мастер-класстың түңнелинде эге школа-интернаттың башкылары болгаш ажылчыннары 2 камгаланыр четкини, а улуг школа-интернат 1 четкини өрээш, дужааганнар. Ону хүлээп алырда, шуптузун шын шараанын хынаан. Улуг школа коллективи 4 дугаар четкини өрүп эгелээннер.
Школавыстың ажылчыннары камгаланыр четки өрүүрүнден аңгыда, ооң мурнунда аъш-чем, акша- хөреңги чыырынга база үлүг-хуузун киирип турган. Бистиң школавыс ТШО-да киржип турар чаңгыс чер чурттугларывыска деткимче көргүзер акцияларга үргүлчү киржип, болгу дег өске-даа дуза кадарынга ам-даа белен.
Лолита ДАРЖАЙ, дефектолог башкы.
Кызыл хоорай.
Чуруктарны школа-интернаттың архивинден алган.
"Шын" №15 2025 чылдың апрель 24
