Чоокта чаа Кызыл хоорайның Убсу-Нурская кудумчузунуң 6 дугаар бажыңының чурттакчыларынга хай-халап таварышкан. Бир квартирага өрт өөскээш, бүгү бажыңны кара ыш-биле хөме алган. Дөрт дугаар каътта чурттап турар пенсионер Ирина Донгактың оран-савазын база кара ыш оюп эртпээн. Улуг назылыг эне бүрүнү-биле хөме алган кара хөөнү канчап-даа аштап-арыглап шыдавас. Ынчангаш «Тываның буянныг чүректери» аныяктар шимчээшкининиң командазы хоочунга дузалажыр деп шиитпирлээн.
«Буянныг чүректер» командазы кырганның квартиразының соңгаларын чуггаш, ханаларын болгаш обойларын аштап-арыглааш, шалазын арыдыр чуп бергеннер. Волонтёрларның дузазы Ирина Донгакка дыка улуг деткимче болган, ынчангаш ол өөрүп четтиргенин илереткен.
Дуза хереглеп турар кижилерни деткиири эң-не кол дээрзин аныяктар шимчээшкининиң удуртукчузу Артыш Монгуш демдеглээн. Ол транспорт-биле деткээн Тыва Республика талазы-биле Улусчу фронтуга база четтиргенин илереткен. Буянныг болгаш бот-боттарын деткижер чорук кандыг-даа бергелерни ажып эртеринге база эң-не берге байдалдарда идегелди сөңнээринге бо чорук тодаргай чижек болуп турар.
«Тываның буянныг чүректери» аныяктар шимчээшкининиң медээзи болгаш чуруктары.
“Шын №2 2025 чылдың январь 22
