Найысылал Кызылдың хавак кырында Республиканың 1 дугаар эмнелгезиниң неврология салбырынга эмнедип чыттым. Эмнелгениң ишти арыг-силиг, чылыг-чырык, эмчилери эвилең-ээлдек, эмнедип чыдар аарыг кижилерге таарымчалыг байдалды тургускан-дыр.
Амгы үеде ук салбырның улуг эмчизи Сайлана Самбуу-Хөө коллективин билдилиг удуртуп турар. Сайлана Михайловна эвилең-ээлдек, чугаакыр эмчи болду. Эмчи сестралары аарыг улусту эки ажаап карактаар-дыр. Окулист эмчи Белла Борисовна бо эмнелгеге эгезинден тура ажылдаан, ажылын эки билир, кижилерге эки хамаарылгалыг эмчи болду. Эмчи сестразы Долаана Маскыр-ооловна Конгарның холу дыка чымчак, капельница салып турда дуржулгазы улуг. Эрготерапевт Александра Вадимовна, Долаана Семисовна дээш өске-даа эмчилерниң, эмчи сестраларының, санитаркаларның шупту аарыг кижилерге хамаарылгазының экизин, ажыл-ижинге кызымаан эскердим.
Неврология салбырында чыдып эмнедип турар улустуң хөйүн кайгадым. Ынчалза-даа эмчилер кижи бүрүзүнге эки хамаарылгалыг, шуптузун эки шынарлыг эмнеп турар-дыр. Эмнелгениң дериг-херекселдери шупту чаа болгаш эмнээшкини дээштиг, кижилер оон эки сегип үнүп турар. Мен бодум база эмчилерниң күжү-биле экижип, байдалым эки апардым. Ынчангаш бо эмнелгениң бүгү коллективинге четтиргеним илеретпишаан, ажыл-ижинге үре-түңнелдиг болурун күзедим.
Чечекмаа САДИ, ТР-ниң алдарлыг ажылдакчызы.
Эрзин кожуун.
Чурукту авторнуң архивинден алган.
“Шын” №19 2025 чылдың май 22