Чадаана хоорайда Монгуш Буян-Бадыргы аттыг Тываның Национал музейиниң салбырынга "Буянныг өгбевиске мөгейиг" деп ужуражылга болуп эрткен. Аңаа Чөөн-Хемчик кожууннуң бүгү сумуларындан хоочуннар болгаш Чадаананың 1 дугаар ортумак школазының 10-гу классчылары киришкеннер. Музейниң директору Доржу Дамба-Доржуевич Монгуш сөс алгаш, Тываның билдингир чогаалчызы, "Делегейниң дириг эртинези" аттың эдилекчизи, Хамнар ниитилелиниң президентизи, Хөндергей чурттуг өгбевис, хөй номнарның автору Монгуш Борахович Кенин-Лопсанның 100 харлаанынга тураскааткан делгелгениң ажыттынганын чыылганнарга таныштырган.
Монгуш Борахович Чадаанага М. Буян-Бадыргы аттыг музейниң ажыттынарынга үлүүн кииргенин демдеглээш, Тываның культуразының алдарлыг ажылдакчызы Зоя Кертик-ооловна Балчыыракка сөстү дамчыткан. Ол чылдарда кожууннуң культура эргелелиниң удуртукчузу Зоя Балчыырак Кызылга Алдан-Маадыр аттыг музей чанында Монгуш Бораховичиниң ажылдап, шинчилел ажылдары кылбышаан, чон хүлээп ап турган казанаанга чедип, музей тургузар дээнин дыңнадып, ону кылып чорударының талазы-биле арга-сүме айтырган. Хүндүлүг чогаалчывыс эки эгелээшкинни деткип, концепциязын бижээн. Валерий Николаевич Елизаров болгаш өске-даа музей ажылдакчылары Чадаанага келгеш ажылдап, музейниң ажыттынарынга чедир үлүүн кииргеннер. Музейниң баштайгы директорунга Виктория Кууларовна Пюрюнааны томуйлаанын, ооң-биле кады ажылдап эгелээнин хоочун сактып чугаалаан.
Ужуражылгага сактыышкыннарны хоочуннар чугаалап, чогааткан ырыларын, шүлүктерин номчуп турдулар. Чогаалчының бижик кагар машиназы, тоннары, бөрттери, номнарын, хуваанактарын делгеп көргүскен.
Вячеслав МОНГУШ.
Чадаана хоорай.
Авторнуң тырттырган чуруктары.
“Шын” №14 2025 чылдың апрель 17
