Ийи чыл бурунгаар Бай-Хаак кудумчузунга чаа ажыттынган поликлиниканың участок сестразы диспансеризация эртер силер дээрзин телефон дамчыштыр дыңнатты. Чаа ажыттынган эмчиге бир дугаар келгеним ол. Чырык, чылыг, делгем өрээлдерлиг чаражы кончуг болду. Ооң мурнунда Востокта поликлиникага турган болгай бис. 36 дугаар участоктуң эмчизи Онзагай Эдуардовна ковид дээш диспансеризация эртпейн турганын чугаалааш, шупту эмчилерге кирер анализтер дужаар бижидилгени бергеш, эртип алырын сүмеледи. Шынап-ла, ковид үезинде эмчи баарындан коргар болгай бис, ол сүме езугаар шупту эмчилерни эртип алдым.
Школачы үемден эгелээш-ле, карак-шили кедер чораан мен. Карак эмчилери тускай аппаратка көргеш, катаракта деп диагносту салгаш, эрте дээре эмчилеп алырын сүмеледи. Томск хоорайда ыяап-ла камгаладылга-биле халас кезиишкинни кылып турарын чугааладылар. “Бо үеде кадыымның аайы-биле ырак чер барып шыдавас мен” –дээримге, “Кызыл хоорайда база кезип эмнеп турар, чүгле оочур манаар силер” – дээш, бижидип кагды. Ол аарыгны канчаар кезип эмнээриниң дугайында сонуургап, номчуп, таныырым улустан айтырып эгеледим. Ооң дугайында эки-даа, багай-даа талаларын билип алдым. Ам карактың көөрү база хүнден хүнче баксырап турарын эскердим. Оочурум-даа келген, кезиишкинче киреринге белеткенгеш, чыдып алдым.
Айлана Шурунзаловна эмчи мени хүлээп алгаш, каш янзы аппараттарга хынап көргеш, кезиишкинни кылды. Караам көөрү дыка эки апарган. Ооң мурнунда карак-шилдиг-даа болзумза, бүлүргей дүрзүлер, хөлеге көрүп чораан болдум. Өртемчейниң өңгүр каазын база катап көөр болганымга өөрүп, “алдын холдуг”, буянныг эмчилерге мөгейдим. Диспансеризация эртерин сүмелээн сестра, эмчилер Солаңгы Валерьевна, Алиса Кимовна, Чаяна Васильевнага өөрүп четтиргенимни илереттим.
Карак салбырының Николай Григорьевичиниң удуртулгазында найыралдыг коллективтиң эмчилеринге, сестраларынга, санитаркаларынга, амданныг чем-биле чемгерип турган повар уругларымга өөрүп четтиргеним база катап илеретпишаан, ажылынга чедиишкиннерни, сайзыралды, хууда амыдыралынга аас-кежикти, өөрүшкүнү, быжыг кадыкшылды, узун назынны күзедим.
Валентина ДОНГАК.
Кызыл хоорай.
«Шын» №87 2023 чылдың ноябрь 15