Эрзин кожууннуң Өг-бүлелерге болгаш уругларга социал деткимче төвүнуң ажыл-ижин демдеглевес арга чок. Ында амыдыралы берге байдалда өг-бүлелерниң ажы-төлүн түр үеде чурттадып турар. Ук төптүң ажылдакчылары уругларга чурттаарынга шупту эки байдалды тургузуп бээр дээш кызып ажылдап турар.
Төптүң даштындан көөрге-ле ында эрес-кежээ кижилер ажылдап турар деп илдең — девискээри арыг-силиг, чечектер болгаш ногаа-чимисти тараан. Ооң даргазы Диана Алдын-ооловна Чалдыг ажылынга бердинген, ээлдек-эвилең удуртукчу. Раиса Бөөйевна бичии чаштарга дыка эптиг, үлегерлиг эмчи. Төптүң эрес-кежээ ажылдакчылары Урана Валерьевнаның, Дина Чоодуевнаның дээш өскелерниң-даа ажылын үнелээр-дир мен.
Бо социал албан чериниң ажылдакчыларын харыысалгалыг, ажыл-ижинге шынчы, бердинген ажылдап чоруур езулуг буянныг кижилер-дир деп көөр-дүр мен. Ынчангаш оларның чымыштыг ажыл-ижинге чедиишкминнерни, моон-даа соңгаар эки ажылдаарын күзээр-дир мен.
Чечекмаа САДИ, ТР-ниң алдарлыг ажылдакчызы.
Эрзин кожуун.
“Шын” №65 2024 чылдың август 28