Монополияга удур федералдыг албанның Тыва Республика талазы-биле эргелелиниң (УФАС) удуртукчузу Феликс Хаджиев массалыг информация чепсектериниң журналистеринге парлалга конференциязын эрттирген. Ук албанның удуртукчузу монополияга удур албанның 2023 чылда кылып чоруткан ажылын илеткээн.
Феликс Хаджиевтиң чугаазы-биле алырга, бо үе дургузунда кандыг-бир аъш-чем болгаш кывар-чаар чүүлдер өртектериниң доктаамал эвезинге хамаарышкан аңгы-аңгы байдалдар ужун УФАС күжениишкинниг ажылдаан.
«Эрткен 12 ай дургузунда күрүнеден садып алыышкын адырынга 111 хомудалды сайгарган түңнелинде, ооң 35-жи барымдаа чок, а 55-ин барымдаалыг деп санаан. Хыналдаларның түңнелинде, ниитизи-биле күрүнеден садып алыышкын талазы-биле 60 керээ системазының дугайында хоойлу-дүрүмге хажыдыышкыннарны илередип тыпкаш, узуткаан» — деп, Феликс Хаджиев чугаалаан.
Эрткен чыл дургузунда регионнуң монополияга удур эргелели 17 күрүнеден садып алыышкын талазы-биле пландан дашкаар 34 документ хыналдазын база планныг 2 үнүүшкүннү чоруткан.
Отчеттуг үеде 500 муң ажыг рубль торгаалдарны албан-дужаалдыг кижилерге онааган. Ниитизи-биле отчеттуг үеде бюджетче 24 млн рубль кирген.
Ол ышкаш эрткен чылын республиканың монополияга удур албаны Чижилге камгалалының дугайында хоойлуга хамаарыштыр 5 хажыдыышкынны илереткен. Чижээлээрге, ТР-ниң девискээринде кадыг коммунал артынчылар сөөртүр ажылды чорудуп турар «Транспорт сервизи болгаш төлевилел» КУБ-туң өртектер тургузар талазы-биле хажыдыышкын барымдаазының талазы-биле шиитпирни үндүрген. Түңнелинде, хереглекчилерниң эрге-ажыктарынга хажыдыышкын болган.
Эрткен чылын республикага реклама ажылынга хамаарыштыр 11 херекти оттургаш, көрген. Административтиг торгаал-биле 455 муң ажыг рубльди тырткан. Реклама дугайында хоойлуга хажыдыышкыннар колдуунда негелделерге дүүшпес реклама тарадыкчыларынга хамааржыр, чижээлээрге, алкоголь продукциязының рекламазынга азы чээли бээр биче саң-хөө организацияларының рекламалары.
Ведомствонуң удуртукчузу 2024 чылдың планнарын чугаалап тура, чижилге талазы-биле субъектилерниң ажыл-чорудулгазынга хамаарыштыр хыналда болгаш хайгаарал чорудар хүн-бүрүнүң ажыл-херектеринден аңгыда, рынокта кывар-чаар материалдар садып-сайгарып турар беш ажыл-агыйжы субъектиге хамаарыштыр монополияга удур хоойлуга хажыдыышкын кылган дугайында 2023 чылдың төнчүзүнде оттурган херекти доозары эргежок чугула деп демдеглээн.
«Бо хүнде ооң саны 9 четкен. Оттурган херектиң алыс ужуру мындыг: Тывага эрткен күзүн кывар-чаар материалдар өртээ хенертен өскеш, дыка үр үе дургузунда батпайн турганын шупту сактыр бис. Өртектерни үр үе дургузунда бадырбайн турганы чүл дизе, ажыл-агыйжы субъектилер аразында чижилгеге удур дугуржулга кылган бооп болур» — деп, регионалдыг УФАС-тың удуртукчузу тайылбырлаан.
Бистиң корр.
«Шын» №20 2024 чылдың март 16
