Тывада 17 ортумак профессионал өөредилге черлериниң аразында Кызылдың эрге-хоойлу болгаш экономика техникумунуң башкылары коллективи чедиишкинниг ажылдап турар коллективтерниң бирээзи.
Сургуулдарга билиг-мергежил чедирер талазы-биле кол эртемнер — саң-хөө болгаш эрге-хоойлу айтырыглары-биле чергелештир, информастыг технологиялар, банк системазы, хоойлу-дүрүм болгаш социал-хандырылга айтырыглары, повар база кондитер ажыл-херээ, ол ышкаш туризм адырынга уруглар, оолдарны өөредип турар.
Сөөлгү чылдарда Кызылдың эрге-хоойлу болгаш экономика техникумун 1987 чылда Новосибирскиниң Совет кооперация болгаш садыг талазы-биле өөредилге черин, а 1999 чылда РФ-тиң Төп хереглекчилер эвилелиниң Москвада университедин дооскан Ольга Кондрашова билдилиг удуртуп эгелээн.
Техникумнуң башкылары болгаш сургуулдары Кызыл хоорай болгаш республика чергелиг, ол ышкаш Бүгү-россия, ол хамаанчок делегей чергелиг мөөрейлер, фестивальдарның идепкейлиг киржикчилери. Чоокта чаа Ада-чурттуң Улуг дайынынга Тиилелгениң 78 чылдааны таварыштыр бирги курстуң сургуулдарының аразынга шериг-патриотчу "Зарница" оюнун эрттирген.
Ооң түңнелинде, бирги шаңналга 906, ийиги-үшкү черлерге 901 — 903 бөлүктерниң сургуулдары төлептиг болганнар.
Угаан-медерел сайзырадыр, инерактивтиг квест оюнга уруглар, оолдар улуг сонуургал-биле киришкен.
Кызылдың эрге-хоойлу болгаш экономика техникумунуң башкызы Надежда Ооржак "100 методиктиг ажылдар — 2023" деп Россия чергелиг мөөрейге "Ие капиталы" деп практиктиг кичээлдерге ажыглаар методиктиг ажылын киириштиргеш, 2-ги чергениң диплому-биле шаңнаткан.
"Амгы үениң чидиг айтырыглары" деп темалыг сургуулдарның эртем-практиктиг конференциязынга 1-ги курсчу Орлана Сандык бирги черни бүзүрелдии-биле чаалап алган. "Эрге-хоойлу ажыл-чорудулгазы" деп мергежилде өөренип турар сургуулду ИХЯ-ның Истелге эргелелиниң хоочуну, дээди мергежилдиг юрист башкы Валентина Каштак удуртуп, баштап белеткээн.
База-ла Улуг Тиилелгениң 78 чылдаанынга тураскааткан шериг-патриотчу ырыларның "Тиилелгениң ноталары" деп фестивалынга "Сагыш-сеткилди хөлзедир ырлап күүсеткени" деп номинацияга техникумнуң сургуулу Ай-Кат Намчак-оол шылгараан.
Делегей чергелиг "Төөгү болгаш чер-чурт шинчилели" деп эртем-шинчилел конференциязынга Джигмед Танзы-Белек 3-кү чергениң дипломунга төлептиг болган. Төөгү эртеминге салымныг сургуулду Алдан-Маадыр аттыг музейниң салбыры, "Политиктиг репрессия, шаажылалга таварышканнар" музейниң эргелекчизи Шолбан Ооржак белеткеп, эртем удуртукчузу болган.
Эртем-шинчилел конференцияларындан аңгыда, спортчу хемчеглерге, ооң-биле чергелештир хөй-ниити ажылдарынга база идепкейлиг башкыларның болгаш сургуулдарның хөй-хөй чедиишкиннериниң бо дээрге чүгле эвээш кезии-дир. Тыва Республиканың өөредилге адырында база бир быжыг турушту бүзүрелдиибиле эээлеп турар ортумак өөредилге чери моон-даа соңгаар сайзыраар дээрзи билдингир.
Кызылдың эрге-хоойлу болгаш экономика техникуму прокуратура, ИХЯ, Федералдыг кеземче күүседир талазы-биле эргелел, Онза байдалдар яамызы, Суд приставтары дээш өске-даа эрге-хоойлу органнары-биле быжыг харылзаалыг ажылдап турар. Ооң бадыткалы ИХЯ-ның хоочуннарынга компьютер билиглериниң талазы-биле мөөрейни эрттиргени болур. Полиция, истелге адырының хоочуннары, халажылгада полковниктер Чодураа Түметеевна Донгак, Марат-оол Идамович Ондар, Тоня Доржуевна Авыда дээш оон-даа өске хоочуннар аңаа идепкейлиг киришкен.
Валентина КАШТАК, эрге-хоойлу эртемнериниң башкызы.
"Шын" №35 2023 чылдың май 17
