Март 3-те Кызылда национал паркка Шагаага тураскааткан тыва ча адар оюнга ниитизи-биле 160 адыгжы киришкен.
Эр улус 45 метр хемчээлге “Баг адар хевирге” адааннашканнар. Херээжен улус 40 метрге “ Борбаанды адар хевирге” мөөрейлешкеннер. Маргылдааның кол сорулгазы Тывага, бурунгу “Уранхай ча адар хевирни” делегей чергеге чедир сайзырадыры болур.
Ча адар мөөрейниң ажыдыышкынынга, Тываның мерген адыгжылары, Тыва ча федерациязы, Тыва үндезин культура сайзырадыр төп база Тыва национал спорт сайзырадыр төп байырлыг ажыдыышкынга киришкеннер. Мөөрейниң түңнелинде “Баг адарынга” дараазында адыгжылар тергиидээннер. “Шагаа–2025-тиң” тиилекчизи деп атка Чөөн-Хемчик кожууннуң адыгжызы Арсен Монгуш төлептиг болган. Дараазында 2 дугаар черни Барыын-Хемчиктен Начын Сарыглар, 3-кү черде Чаа-Хөлден Аяс Монгуш, 4-кү черде Чөөн-Хемчиктен Сылдыс Монгуш, 5-ки черде Барыын-Хемчиктен Чадаң-Кат Ооржак, 6-гы черде Чөөн-Хемчиктен Буян-Цо Сат, 7-ги черде Чөөн-Хемчиктен Альберт Сарыглар, 8-ки черде Улуг-Хемден Орлан Чанчып болганнар.
Херээжен улус аразынга ”Борбаанды адар хевирге” дараазында адыгжылар шылгарааннар.
Бирги черге Улуг-Хем кожууннуң адыгжызы Чинчи Монгуш төлептиг болган. Дараазында 2 дугаар черни Барыын-Хемчиктен Раджана Куулар, 3-кү черде Тес-Хемден Чимис Кыргыс, 4-кү черде Бай-Тайгадан Сорунза Салчак, 5-ки черде Улуг-Хемден Шеңне Даржай, 6-гы черде Чөөн-Хемчиктен Байлак Монгуш, 7-ги черде Кызылдан 83 харлыг хоочун тренер Раиса Тутатчикова, 8-ки черде Улуг-Хемден Азиана Намдал.
Амгы үеде Тыва ча адар оюн бурун хевиринче шилчээни улуг чоргаарал. Уранхай ча адар оюннуң сайзыралынга, Тыва үндезин культура төвү база Андрей Монгуштуң киирген улуг үлүүн демдеглевес арга чок. Тыва ча адар оюн, эки сайзыраар-ла болзун дээш йөрээлди салып, курайладывыс.
Алексей ЧАМБАЛ-ООЛ, спорттуң хоочуну.
Буян ООРЖАКТЫҢ тырттырганы болгаш интернеттен алган чуруктар.
“Шын” №8 2025 чылдың март 6