Часкы үеде кижиниң организминге витаминнер чедишпестеп эгелээр болгай, ынчангаш хөй чүүл негеттинмес, кылыры белен витаминниг салатты сүмелээр-дир бис.
Салат чүгле витаминнер-биле бай эвес, кижиниң ижин-шөйүндүзүн арыглаар, артык кил чидирер база ижин согунуң (желудочный сок) ажылдадырын экижидер. Ол ышкаш диета сагып турар кижилерге эвээш калорийлиг болгаш дыка тааржыр, чүге дизе ооң составында хөй витаминнер, микроэлементилер, клетчатка база пектин бар.
Херек чүүлдер: капуста, морковь, свекла, ногаан бүрүлерлиг ногаа (салат, шпинат, руккола дээш өске-даа), лимон хандызы, оливка үзү.
Кылыры: Капустаны чиңгеледир доорааш, морковь болгаш свекланы улуг үттүг дүрбүүшке дүрбээш (кайы хирени кижи бодунуу-биле таарыштырар), ногаан бүрүлерни, укропту, петрушканы азы сельдерейни холуур. Ооң кырынче бичеледир доораан чеснокту, оливка үзүн, лимон хандызын каар. Аргалыг болза дус немевес, бир эвес амдан чок болза, соя соузун дус орнунга ажыглап болур. Ол кадыкка хора чок боорда, хоолулуг.
Дүъштеки чем үезинде кылып чиирин сүмелээр-дир бис. Чем чиртингир болзун!
«Шын» №18 2025 чылдың май 15