ЧЕР-ЧЕРЛЕРДЕ КАПИТАЛ СЕПТЕЛГЕЛЕР ЧОРУП ТУРАР

«Культура» национал төлевилелдиң иштинге Алдан-Маадыр болгаш Эрги-Барлык суурларда культура бажыңнарының капитал септелгези эгелей бергенин республиканың Культура яамызы дыңнадып турар. Баштайгызында ажылдарны “Депшилге” КХН, ийизинде - Хуурак деп хууда сайгарлыкчы чорудуп турар. Кайызы-даа холу эдиккен, байлак арга-дуржулгалыг күүседикчилер. Септелгеге херек тудуг материалдары дүжүртүнген, ажыл кидин түлүк чоруп турар. Оларны август 1-ге чедир доозары көрдүнген. Бо ийи тудугнуң кайызында-даа тус черниң тудугжуларының саны хөй.

Каа-Хем кожууннуң Сарыг-Сеп суурда В.Г. Иванов аттыг уругларның уран чүүл школазында үндезин септелге база чоруп турар. Ону “Бастион” КХН бо чылдың күс төнчүледир доозар.

Ниитизи-биле бо ийи Культура бажыңының септелгезинге федералдыг болгаш республика бюджединден 33 сая 325 муң рубльди углаар. А Сарыг-Септе уругларның уран чүүл школазының септелгезинче ийи чылдың дургузунда 73 сая рубльди чорудар.

Ажылдарның канчаар чоруп турарын хамаарышкан яамылар доктаамал хайгаарап турар.

#Шын #Капиталсептелге #Культура #Националтөлевилел #Медээ