Тываның шупту кожууннарының буянныг сеткилдиг чурттакчылары, регоннуң кожууннары, сумулары болгаш организациялары ниити тиилелгеже боттарының үлүүн киирерин уламчылап турар. Тускай шериг операциянда дайынчыларже чоруткан 2024 чылдың сөөлгү дузазы чедер черинде чеде берген.
Гуманитарлыг дузаны чыырын Тываның Чазааның даргазының оралакчызы Айдыс Сынаа башкарып турган, ону Дээди Хуралдың депутады Эрес Хуурак удуртуп чедирген.
“Гуманитарлыг дузаны Луганск Улус Республиканың Свердловск хоорайга болгаш Донецк Республиканың Донецк хоорайга чедирген. Тыва Республиканың Чазаанга болгаш Тываның Баштыңы Вячеслав Товарищтаевич Ховалыгга, Дээди Хуралга болгаш ооң даргазы Кан-оол Даваага, ол ышкаш Тываның буянныг сагыш-сеткилдиг шупту чурттакчыларынга тускай шериг операцияның девискээринде маадырлыы-биле тулчуп турар дайынчыларның мурнундан өөрүп четтирдивис. Эът дээрге тыва кижиниң кол чеми, өг-бүлезиниң чылыг-чылыы болгай, ынчангаш гуманитарлыг дузага эът чоруткан кожууннарны демдеглекседим”– деп, Эрес Хуурак чугаалаан.
Сөөлгү чоруткан гуманитарлыг дузада эң үнелиг чүък – тус черниң малының эъди – хой, аът болгаш инек эъди. Эът эки шынарын чидирбезин дээш, ону тускай соодукчу дериг-херексел-биле дериттинген транспортка чүдүрген.
«Мөңгүн-Тайга кожууннуң хүндүлүг чурттакчылары болгаш буянныг сагыш-сеткилдиг чаңгыс чер чурттугларывыс, силерниң чорутканыңар гуманитарлыг чүъктү алдывыс – ол дээрге эът, чылыг чеңи-чоктар. Штурмнаар 1435-ги полктуң мурнундан чедирген дузаңар дээш өөрүп четтиргенивисти база катап илередип тур бис» – деп, чүъктү хүлээп алган дайынчылар видео бижик таварыштыр чугаалаан.
Тускай шериг операцияның девискээринде хостакчы миссиялыг дайынчыларга генераторларны, чылыг пушкаларын болгаш чугула херек шупту эмнерни база харылзаа дериг-херекселин, ол ышкаш дең-дески эвес черлерге дүрген чоруур 12 даг мотоциклдерин чедирген.
«Тыва Республиканың хүндүлүг чурттакчылары, Кызыл кожуун, Тыва Республиканың Чазаа, Улусчу фронт, мотоцикл болгаш өске-даа ажыктыг чүүлдер-биле биске чедирген гуманитарлыг дузаңар дээш өөрүп четтирдивис. Бо мотоцикл дайынчы даалганы күүседир дээш чоруптар, ооң-биле хөй хемчеглерни ап чорудар»– деп чугаалап турар видео бижикти ТШО дайынчылары чоруткан.
«Кижи бүрүзү чедирген шупту дуза дээш Тыва Республиканың хүндүлүг чурттакчыларынга өөрүп четтирдим. Бис гуманитарлыг дузаны алдывыс, мен бодум Самара хоорайның 30-ги бригадазында шериг албан-хүлээлгем эрттирип турар мен» – деп, Самара хоорайның 30 дугаар бригадазының дайынчызы чугаалаан.
Регионнуң Чазааның деткимчези-биле гуманитарлыг дузаны чаңгыс чер чурттугларывыстың күжү-биле “Бүгү чүүлдү тиилелгеге” төлевилелдиң угланыышкынынга чыгганын сагындырып каалы. Ниити миссияга каттышкаш кижилерниң шуптузунуң кол сорулгазы – дайынчы хөделиишкиннерниң зоназында бистиң оолдарывыска дузалаары. Ону дайынчылар билип турар.
«Бүгү тыва чонга байыр чедирип тур бис! Тускай шериг операцияда шериглер силерге Чаа Чыл-биле байыр чедирип турлар! Силерге болгаш силерниң чоок кижилериңерге быжыг кадыкшылды, бодап алган чүүлдериңер шуптузу бүдерин болгаш кырыңарга тайбың дээрни күзеп тур бис. Чаа Чыл-биле!»– деп, чугаалап турар видео бижикти тускай шериг операциязында киржип турар чаңгыс чер-чурттугларывыс социал четки таварыштыр чоруткан.
Бистиң корр.