Чүүлдүгзүнер-дир мен

ТР-ниң Баштыңының 2023 чылда Айыткалынга хамаарыштыр Тываның улустуң хөөмейжизи, РФ-тиң «Россияның сагыш-сеткили» аттарның эдилекчизи, Тыва үндезин культура төвүнүң директору Игорь Көшкендей бодалын илереткен:

— ТР-ниң Баштыңының Айыткалын дыңнааш, чүүлдүгзүнген чүүлдерим хөй болду. Ынчалза-даа оларның элээн кажын онзалап демдегледим.
Бирээде, Кызыл хоорайның 2 дугаар школазының баазазынга тыва педагогиканың метод төвүн ажыткаш, ук школаны Национал гимназия кылдыр эде адаарын чугаалады. Тыва дылды күрүне дылы-биле деңнээр дээни өөрүнчүг-дүр. Ынчангаш аңаа хамаарыштыр күжениишкинниг ажылдарны чорудуп эгелээр чүве болза, дыка-ла эки-дир. Тыва чон ук-төөгүзүнден бээр РФ-тиң өске регионнарындан ылгалдыг, уран талантылыг, тускай төөгүлүг биче-буурай чон болуп турар бис. Ынчангаш шак ол чоннуң төрээн дылын камгалаар, кадагалаар болза эки деп бодаар-дыр мен.

Ийи дугаарында, сагыш-сеткил культуразынче кичээнгей салып турар деп билдим. Ол дээрге-ле тыва чаагай чаңчылдарны болгаш өг-бүле дугайында билиишкиннерни «сергедир» деп турары болду. Ол база, шынап-ла, чөптүг чүүл-дүр. Быжыг күрүне эптиг-найыралдыг өг-бүлелерден тургустунган болгай.

Оон ыңай мени кончуг сонуургаткан чүүл болза, туризмниң инфраструктуразын сайзырадырының дугайында планнары-дыр. Аржаан сугларывыс, хөлдеривис, овааларывыс, арт-сыннарывыс дээш ыдыктыг деп санаарывыс бо черлерни сайзырадып, оларны хумагалыг эдилээрин, үнелээрин чедип алыры чугула деп санап турарын чөптүг чорук деп көрүп тур мен.

А.Ондар чугаалашкан.
Ада ТЮЛЮШТУҢ тырттырган чуруу.