ЧОГААЛ АРЫНЫ.

ШҮЛҮКТЕР КЫДЫРААЖЫНДАН

СҮТТҮГ ШАЙЫМ

Өгбелерим буянындан дамчып келген
Өремелиг сүттүг шайым таан чаагай.
Өөрүшкүнү сөңневишаан, сергедиптер
Өргүн чонум чеми болган сүттүг шайым.

Эртен эрте туруп келгеш, хайындырган
Аъш-чемим арыг-чаагай дээжизи боор
Сүттүг шайым үстүн чажып, өртемчейден
Сүлде-сүзүк, буян дилээр чаңчылдыг мен.

Сүүзүннүг сүттүг шайым ада-ием
Сүзүү сиңген ыдыктыг-ла чеми боорга,
Деримни төгүлдүр-ле аартап ижер
Дендии чаагай амданныг сүттүг шайым.

ИШЧИ КҮЗҮМ

Алдын-сарыг хевин кеткен
Ажыл-ишчи күзүм келди.
Савазыраан чаагай дүжүт
Хамык чонну далаштырды.

Арбын малдың ээлери
Аажок эрес малчыннар
Күстүң чаагай беримчезин
Кажаа долдур сарааттап тур.

Алдын күзүм, чараш күзүм
Аъш-чеми элбек өйде
Анаа орбас кежээ чонум
Ажаанзырап, чай чок-ла тур.

/ Алефтина АДЫШАА.