Чөпшээрел чок ажыглап турган боозун эки тура-биле полицияга дужааган улуска акша бээр дугайында ТР-ниң ИХЯ-зы дыңнадып турар.
Бир эвес бажыңында хоойлуга удур чөпшээрел чок ок-чепсек, боо шыгжап турар болза, ол дээш кеземче херээнге онаажып болур дээрзин шупту билир. Ынчангаш ок-боону ажыглаксаар, ылаңгыя аңнаарынга сундулуг улус, кокай-бөрүден малын камгалаар сорулгалыг малчыннар боо ажыглаар лицензияны (чөпшээрелди) дарый кылдырып алыр азы полицияга эки тура-биле дужааганы дээре. Эки тура-биле дужааганы дээш кеземче херээнден хостаар.
Тыва Республиканың Бойдус камгалалының комитеди чөпшээрел чок боо-чепсек дужааган улуска дараазында акша төлевирин бээр дээнин дыңнаткан:
- аңчы боо болгаш хол боозу дээш – 15 000 рубль;
- аңчы хараалдыг боо дээш – 10 000 рубль;
- кылымал азы эде кылган боо дээш – 5000 рубль;
- бот-камгалалга ажыглаар боо дээш – 2000 рубль;
- боо октары дээш (шт.) – 10 рубль;
- граната, мина, частыр чепсек (шт.) – 1000 рубль;
- чазылдырар чүүлдер (100 грамм) – 400 рубль;
- чазылдырар херексел (чаңгыс) – 1500 рубль;
- частыышкын болдуруп болур чүүлдер (чаңгыс) – 300 рубль;
- чазылдырар чүүлдерге ажыглаар сывырындак (1 метр) – 100 рубль.
Оон аңгыда чөпшээрел чок боо-чепсек шыгжап турар улус дугайында тодаргай медээ дамчыткан кижиге, илереттинген боо дээш каш акша төлевир көрдүнген, ооң 50 хуузун төлээр.
Шак ындыг медээ дамчыткан улуска төлевир акшаландырыышкын “Тыва Республикага 2024–2030 чылдарда хөй-ниитиниң корум-чурумун хандырары болгаш кем-херек үүлгедиин болдурбазы” ТР-ниң күрүне программазында көрдүнген. 2025 чылда көрдүнген 100 муң рубльдиң 2 муңу ажыглаттынган.
ТР-ниң ИХЯ-ның парлалга албанының медээзинден.
Чурукту интернет четкизинден хоолгалаан.
“Шын” №34 2025 чылдың сентябрь 4