«Чаа сорук» төлевилелдиң Бии-Хем кожууннуң Аржаан сумузундан 2021 чылдың киржикчилери Орлан биле Сюзана Доржукайлар ийи чыл улаштыр чээрби баш инээнге онааштыр ол-ла хире бызааны онча-менди камгалап алганнар.
Өг-бүле Чанзаш деп черде малчын турлаан тудуп алган. Өгнүң эр ээзи эрткен күзүн долу эвес мөөңнээшкин ёзугаар шериг албан-хүлээлгезин күүседири-биле кыйгырткан. Ол амгы үеде шөлээлеп келген.
Төлевилелдиң киржикчилери ийи ажы-төлдүг. Дыштанылга үезинде олар ада-иезиниң солуттунмас дузалакчылары апаар. Бо чылын хаваанда чүрек демдектиг төрүттүнген бызаазын уруглары «Чүрекпен» деп шолалай адап алганнар.
Доржукайлар мал чемин четчир кылдыр белеткеп алган болгаш, кыштаглаашкын чүгээр байдалга эрткен. Сюзана Доржукай сумунуң фельдшер-акушер пунктузунда ажылдап турар.
Өг-бүле саан үезинде сүдүн «Аржаан» көдээ ажыл-агый хереглел кооперативиниң сүт болбаазырадыр цегинче дужаап, акша-төгерикти ажылдап алыр аргалыг.
Дайынчы хөделиишкиннер девискээринде шериг албан-хүлээлгезин күүседип турар маадыр чаңгыс чер чурттуунуң өг-бүлезин Орлан Доржукайның кады төрээн акызы, төрел аймаа, Аржаан суму чагырга чериниң удуртулгазы, сумунуң чурттакчылары деткип, ачы-дузазын доктаамал көргүзүп турар.
Шончалай ХОВАЛЫГ.
Авторнуң тырттырган чуруктары.
