Булуң-Терээм маадырлыг оглу, өөреникчим Түмерланга (Хабаровск крайның Князья Волконск аттыг мото-адыгжы бригадазының 6-гы ротазының дайынчызы, биче сержант Ростовский Александр Чойган-ооловичиниң — Баанай Түмерлан Чойган-ооловичиниң чырык адынга)
Кезээде-ле кады чоруур
Башкир солдат эжиң-биле
Келир өй дээш, тайбың чол дээш
Маадырлыг бажың салдың.
Хайыралыг Ада-чуртка
Кара чаңгыс тының бердиң.
Кааң-аяс чырык хүн дээш
Харам чокка чүрээң бердиң.
Сайгын, Сундуй, Шериг-оол дээш
Сайын өөрүң сактып ора,
Үлегерлиг өңнүү сен деп,
Үзе сөглеп, бадыткаар мен.
Булуң-Терек суурувуска
Муңгаравас хөглүг, сергек,
Баштак, чазык Түмерлан сээң
Башкың-даа бооп чораан ийик мен.
Катап келбес чалыы назын
Халас барбаан, төөгү болуп,
Чүс-чүс чылдар дургузунда
Чүректерге артып каар сен.
27.05.2022
Буян ЕНДАН.
“Шын” №3 2024 чылдың январь 17