ЧЫРААЛАДЫП ЧОРУП-ЛА КААР

Өстүрүп ап, өглеп алган
Оглун, кызын чаш деп бодаар,
Өле баштыг кырган-ава
Олут билбес, тамчыктанмас.

Оларынче бо-ла маңнаар
Ожук-пажын ончалай бээр.
Ажыл-ижин сагыш човап,
Айтыргаштың, туруп-ла бээр.

Кызы, кенни божуур дээнде,
Кымдан дора девидей бээр.
Болдуна бээр чүве болза,
Боду барып божупку дег.

Чашты тудуп, ажаап-тежээп,
Чаңгыс-ла мен билир мен дээр.
Чаптанчыглар дорукпаанда,
Чанындан шуут ыравайн баар.

Идик-хевин четчелей бээр,
Бопук, чучак даарап каар.
Ижер-чиирин сагыш салып,
Боова, хуужуур быжырып бээр.

Сактырга-ла, өпеяалар
Салгын, хатка каксыпкан дег.
Уруу ышкаш, кеннин бодап,
Уян хөңнү ажаанзыраар.

Чылыг, чырык, таарымчалыг,
Шыпшың шөлээн бажыңынга
Чыргал-дашты тыппайн баргаш,
Чырааладып чоруп-ла каар.

Адак-бышкаа аартаза-даа,
Амыр көрбес кырган-ава.
Ада-ие болу берген
Ажы-төлүн чаш деп бодаар.

Содунам САЛЧАК.

КАССИР КЫСЧЕ КАЙГАВАС СЕН

Чыраа-бораң шылагзынып,
Шыырныгып дидиреп тур.
Акың сугга аппарып бээр
Ааржы, саржааң арчымакта.

Арыг-Бажы суурдан бээр
Аъттангаштың халыткаш кел.
Каш акшаң үлеп тур боор,
Кассир кысче кайгавас сен.

Кыйбың-сыйбың кыстар сенче
Кызыл чаагын кыяңнатса,
Кылыың уткаш, хүлүмзүрбе,
Хыйыртапкаш, эрте бээр сен.

Хоюң, өшкүң оолдап турар,
Хоначалап саадавайн көр.
Сарыг шайдан хайындыргаш,
Чаглыг эъттен дүлүп каар мен.

Ажыл-херээң чогуткаштың,
Аъш-чемден садып алгаш,
Барба долдур өөрүшкүден
База катай чүктеп кээр сен.

Чылбас кара ээрем дег
Чылгывысты бөлүп чорааш,
Кежээликтей кедээр дагдан
Келир ууңче дураннаар мен.

Владимир ТАРГЫН.
"Шын" №42 2023 чылдың июнь 10