Тывада чедиишкинниг болгаш калбаа-биле боттанып турар төлевилелдерниң бирээзи — “Эзирлерниң уязы”. Биче спорт залының төлевилелиниң бөдүүнү, ону тус черниң материалдарын ажыглап тудуп ап болуру – бо улусчу төлевилелдиң чедиишкинниг талазы.
Чөөн-Хемчик кожууннуң Чыргакы суурга “Эзирлерниң уязын” тудуп дооскаш, ооң ажыдыышкын байырлалын эрттирген. Республиканың спорт сайыдының оралакчызы Субудай Оюн, Тываның Арзылаң мөгези Маадыр Моңгуш, республиканың Начын мөгези Күзечи Куулар, Чөөн-Хемчик кожууннуң чагырга даргазы Алексей Тюлюш олар Чыргакының “Эзирлер уязының” ажыдыышкынынга кээп, спортчу улуг болуушкун-биле чурттакчы чонга байыр чедирип, хүреш болгаш спортуң өске-даа хевирлеринге маргылдааларга чедиишкиннерни күзээннер.
Чыргакының “Эзирлер уязынга” эң баштайгы спортчу болуушкун —сумунуң бичии мөгелериниң аразынга тыва национал хүрешке маргылдаазы.
“Эзирлер уязы” баштай туттунган суурларның арга-дуржулгазындан алырга, биче хевирниң бо залынга чүгле хүрешти эвес, бокс ышкаш улуг хемчээлдиг эвес спортчу шөл херек спорт хевирлерин чедиишкинниг сайзырадып болур.
