Тывада спорт бедик деңнелде хөгжүп турарының херечизи – Ча адарынга Россияның чемпионадын найысылал Кызыл хоорайда Совет Тываның 5 чылы аттыг стадионда эрттирип турары. Аңаа киржири-биле Россияның 20 хире регионнарындан 300 ажыг эң шыырак спортчулар чедип келген. Оларның аразында Россия Федерациязының эң шыырак ча адыкчылары, Россияның чемпионнары болгаш Олимпий оюннарының киржикчилери болгаш тиилекчилери.
Ча адарынга Россияның чемпионадының байырлыг ажыдыышкыны июль 8-те болган. Чемпионадтың киржикчилери спортчулар, Башкортостан, Бурятия, Хакасия, Саха-Якутия республикалар, Москва, Новосибирск областьтар, Москва биле Санкт-Петербург хоорайлар дээш өске-даа регионнарның командалары чыскаалыпкаш, боттарының регионнарының болгаш Россияның туктарын киискидип алгаш, спортчу байырлалды сонуургап келген чүс-чүс көрүкчүлерниң мурну-биле эрткеннер. Чыылган чон оларга байыр чедирип, адыш часкап, деткимче кыйгырыгларны салып турганнар.
Ча адарынга Россияның чемпионадын ажыдарының ёзулалынга Тываның Баштыңы Владислав Ховалыг киржип, спортчу мөөрейниң болгаш байырлалдың ажыттынганын чарлаан.
Россия чергелиг маргылдааларны, чемпионадтарны бистиң республикага эрттирип турар апарганы Тывада спорттуң дүрген болгаш бедик деңнелде хөгжүп турарының херечизи деп чемпионадтың байырлыг ажыдыышкынынга чугаазынга Владислав Ховалыг демдеглээн. Тыва улустуң үш адаан-мөөрейиниң бирээ- зи — ча адары, ол бистиң чонувустуң амыдырал-чуртталгазының, культуразының үндезин кезии, ынчангаш ча спорту Тывада нептереңгей болгаш бедик деңнелде деп республиканың удуртукчузу чугаалаан. Тывага ча спортун сайзырадырынга боттарының улуг үлүүн киирген спортчулар Владимир Сырат, Раиса биле Евгений Тутатчиковтарны, оларның уруу, Олимпий оюннарының киржикчизи Елена Достайны, паралимпий оюннарының тиилекчизи Михаил Оюнну Тываның Баштыңы адаан. Оларның чүгле спортчу тиилелгелериниң эвес, а ча спортун республикага хөгжүдер талазы-биле чорудуп турар организастыг болгаш тренер ажылының түңнелинде Тывага ча спорту улам сайзыраар, бистиң Төрээн чуртувустуң спортчу адын камгалаар чаа-чаа спортчулар көстүп кээр дээрзинге бүзүрелин Владислав Ховалыг илереткен.
Россияның чемпионадын ажытканының байырлыг ёзулалының үезинде бистиң республикага ча спортун сайзырадырынга ачы-дузалыг болган спортчулар, ча адарынга Россияның чыынды командазының начальниги Игорь Крылов, ча адарынга Россияның херээжен улустуң чыынды командазының улуг тренери Галина Щадрина, ча адарынга Россияның эр улустуң чыынды командазының улуг тренери Станислав Забродский, Россия Федерациязының ча спортунуң президентизи, Россияның спортчу командаларын белеткээр Төптүң кол тренери Владимир Ешеев оларга Тыва Республиканың күрүне шаңналдарын тывыскан. “Тыва Республиканың мурнунга ачы-хавыяазы” медальга Владимир Ешеев төлептиг болган.
Россияның чемпионадының байырлыг ажыдыышкынынга ТР-ниң Дээди Хуралының Даргазы Каң-оол Даваа, “Чаңгыс демниг Россия” политиктиг партияның кежигүнү, Садыг-үлетпүр палатазының Чөвүлел даргазы Аяс Мөңге, “Чаңгыс демниг Россия” политиктиг партияның кежигүнү, республиканың алдарлыг артизи Аян Ширижик олар база киржип, спортчу тиилелгелерни ооң киржикчилеринге күзээннер.
Чаа адарынга Россияның чемпионады амгы үеде изиг түлүк уламчылап турар.
Ш. МОҢГУШ.
Буян Ооржактың тырттырган чуруктары.
“Шын” №51 2024 чылдың июль 10
