Тывада чаӊгыс аай дузаламчы акшазын 70 муӊ ажы-төлдүг өг-бүлелер ап турар.
Бо чылын Россияныӊ Социал фондузунуӊ Тыва Республикада салбыры 17 харга чедир назылыг 70 муӊ ажыг уругларныӊ ада-иезинге болгаш 3 муӊ иштиг херээжен улуска чаӊгыс аай дузуламчы акшаны томуйлаан.
Россияныӊ социал фондузунуӊ регионалдыг салбыры ук сорулгалыг ажылды хандырарынга 5 миллиард рубльду угландырган.
Чаӊгыс аай пособие ооӊ мурнунда турган кезек деткимче хемчеглерни солаан. Ол дээрге бир дугаар биле үш дугаар уругларыныӊ 3 харлыынга чедир ай санында бээр төлевири, 3-7 харлыг болгаш 8-17 харлыг уругларга ай санында бээр төлевири, иштиг херээжен улуска ай санында бээр пособиени каттыштырганы-дыр.
Өг-бүлеге чаӊгыс аай пособиени болза оларныӊ амыдыраар акша-хөреӊгизиниӊ четчир-чедишпезин барымдаалап көргеш, дараазында байдалдарда томуйлаар:
- өг-бүлениӊ ортумак орулгазы регионда бир кижиниӊ амыдыраар акша-хөреӊгизи адакы хемчээлин ашпас ужурлуг (Тывада ол 14519 рубль).
- өг-бүлениӊ өнчү-хөреӊгизи доктааттынган негелделерге дүгжүр ужурлуг.
- Өг-бүлениӊ 18 хардан өрү назылыг кежигүннери албан ёзузу-биле акша орулгалыг азы ындыг орулганы ап шыдавазыныӊ чөптүг чылдагаанын бадыткап көргүзер ужурлуг.
Төлевирлерниӊ хемчээлин санаарда, Республиканыӊ чурттакчыларыныӊ амыдыраар акша-хөреӊгизиниӊ адакы хемчээлин барымдаалаар. Ол бичии уругларныӊ 14433 рубль, а ажылдап шыдаар улуг кижиниӊ 15 826 рубль. Өг-бүле болгаш иштиг херээжен кижи бүрүзүнге пособиениӊ хемчээли тус-тузунда аӊгы-аӊгы. Үстүнде айыткан бир кижиниӊ амыдыраар акша-хөреӊгизиниӊ адакы хемчээлиниӊ 50 %,75% болгаш 100 % болур.
Чаӊгыс аай пособие бээриниӊ дугайында билдириишкинни Госуслуга порталын, Россияныӊ Социал фондузунуӊ регионалдыг салбырыныӊ клинтилер албанын, МФЦ офистерин таварыштыр чорудуп болур.
Россияныӊ Социал фондузунуӊ регионалдыг салбырыныӊ клиентилер албаныныӊ специалистери ажыл хүннеринде 09.00 шактан 18.00 шакка чедир ажылдаар. Арга-сүме айтырып харылзажыр телефоннары: 8-800-200-05-43.
Россияныӊ Социал фондузунуӊ Тыва Республикада салбырыныӊ медээлеринден
Р. Демчик белеткээн.