Ажы-төлүмнү эртем-билиглиг кижилер кылдыр өстүрүп, өөредип каанывыс халас барбаан-дыр деп чүвени ам билдим. Чаа чылдың бүдүүзүнде чараш улуг хоорай Москваже чедип барып, беш уйнуум-биле агаарлап, дыштанып, экскурсияладывыс.
Улуг уруум Орлана Орлан-ооловна ийи дээди эртемниг. Ооң өстүрүп, кижизидип каан ийи кызы Москвада чурттап турар. Улуу Сай-Суу Орлановна Калмыкияның күрүне университедин дооскан, дээди эртемниг башкы. Дуңмазы Ай-Суу Москваның юридиктиг университединиң 4-кү курсчузу.
Ийистеримниң бирээзи Чечена Орлан-ооловнаның улуг уруу Айдана Калмыкияда студент. Ол база Москвага ужуп келген.
Хеймер уруум Орляна Орлан-ооловна дээди эртемниг экономист. Ооң уруу Аяна Соян Кызылдың 9 дугаар гимназиязының 10-гу клазында өөренип турар. Ол ийи авашкы-биле Москваже аалдап чораанывыс ол.
Москваже улуг самолетка 90 кижи ужуп четтивис. 5 шак дургузунда ушкаш, Домодедово аэропортунга чедип кээривиске, улуг уйнуум уткуп алды. Уругларым чурттуң улуг төвүнде ипотека-биле квартира алган болду. Оларның чырык, чылыг, чараш бажыңынга доктаап алдывыс.
Ажылдап, өөренип турар хоорайының онзагай чараш черлеринге бисти чедирди. Кремльдиң Кызыл шөлүнге четтивис, Ленинниң мавзолейин көрдүвүс, өшпес отту-даа сонуургадывыс. Хөй каът бажыңнарны санаарымга, 15–20–30-даа каът болур чорду. Эң-не бедик бажың 76 каът. Ону сонуургап лифт-биле үндүвүс-даа. Поездиге, метрога-даа олурдувус. Экскурсиявыс 3 хүн үргүлчүлээн.
Уругларымның уруглары – уйнуктарымның ажыын көрдүм, четтирдим. Москва-даа онза-дыр! Бүгү хоорайны Чаа чыл байырлалынга каастап каан, кылаңайнып чайынналып турар чаражын канчаар!
Москва кыстары шыдаар-дыр, эвилең-ээлдек, дузааргак, дыл-домаа эптиг-чараш. Эртем-билиглиг, угаанныг, онза кыстар өзүп олурлар. Келир үениң келиннери болур кыстарымны мактап, магадап-даа ханмадым. Студент кыстарымга Чаа чылды эки уткуурун, ак орукту, аас-кежикти, кайгамчыктыг кадыкшылды күзедим.
Кырган-авазы Чылбак МОНГУШ.
“Шын” №100 2024 чылдың декабрь 28
