Көдээ ажыл-агый сайыды Юрий Оруспай Россияның кеземче күүседир федералдыг албанының Тыва Республикада эргелелиниң 1 дугаар эдип-чазаар колониязының баазазында дүк болбаазырадыр чаа цехтиң байырлыг ажыдыышкынынга барып четкен.
Ол “Тыва Республикада 2024–2030 чылдарда хөй-ниитиниң корум-чурумун хандырары болгаш корум-чурум үрээшкиннеринге удур ажылдажылга” күрүне программазы-биле Чазактың деткимчезиниң ачызында болдуна берген улуг ужур-уткалыг болуушкун.
Чоокта чаа ажыттынган цех амгы үениң дүктү дыдар, дыраар машиналар болгаш дүк чуур станок-биле чүмнеттинген. Ол национал өгнү бүрүнү-биле бүдүрүптер аргалыг. Оон ыңай чүгле тус черниң ёзу-чаңчылдарын деткип турар эвес, а немелде 7 ажылчын олутту база тургускан.
Чиг эт баазазын хандырары-биле 2023 чылда шээр малдан эдип-чазаар албан черлериниң көдээ ажыл-агый участоктарынга ажыглаары-биле бир тонна ажыг дүктү алган. Ол ышкаш 1 дугаар эдип-чазаар колония ыяш, демир болбаазырадыр, даараныр бүдүрүлге болгаш суй-белектер кылыр адырларда янзы-бүрү продукцияларны бүдүрүп турар.
Бистиң корр.
“Шын” №97 2024 чылдың декабрь 18
