«Тубтен Шедруб Линг» - Россияда сарыг шажынның эң-не улуг хүрээзи. Ооң ажыдыышкыны апрель 28-те болур. Аңаа уткуштур белеткел ажылдары кидин түлүк.
ЧКА яамызының ажылдакчылары тускай техника-биле хүрээни девискээринде тудуг материалдарының артынчыларын болгаш өске-даа бокту аштап, чер-девискээр кырын дескилеп, бок чыыр черлерни аңгылап аайлап турар.
«Чаа хүрээниң хүрээлеңиниң арыг-силии ооң каас-чаражын улам аян киирер. Апрель 28-те байырлыг ёзу-биле ажыдыышкыны дорт дамчыдылгага база болур. Төөгүлүг болуушкунну хөй кижи көөр аргалыг», - деп, ЧКА сайыды Мерген Мынын-оол дыңнаткан.
Хүрээниң ажыдыышкынының бүгү хемчеглерин айыыл чок болгаш бүгүдеге эптиг кылдыр эрттирери чугула дээрзин регион Баштыңы Владислав Ховалыг демдеглээн.
ЧКА яамызының медээзи-биле А. ДОНГАК белеткээн.
