Тываныӊ улуг хүрээзин XXI чүс чылда тудуп кылганы төөгүлүг болуушкун болур дээрзин республиканыӊ Баштыӊы Владислав Ховалыг социал четкиде блогунга бижээн:
«Сарыг шажын хүрээзиниӊ тудуунга барып чордум. Тудугжуларныӊ болгаш мастерлерниӊ ажылы шуудай берген, иштики уран каасталгазын чуруп кылып турар. Чүдүкчүлерниӊ сагыш-сеткилин өөртүп, удавас ажыдыышкынын эрттирер дээш кызымаккай ажылдап турарлар.
Шагаа байырлалыныӊ хүннеринде хүрээниӊ хаалгаларын байырлыг ёзу-биле ажыдарын планнап турар. Эӊ-не чугула сорулгалыг ажыл-херек ол-дур, чүге дизе бистиӊ республикавыс менди-чаагай болзун дээш Ыдыктыг XIV-кү Далай-Лама башкыныӊ дамчыдып бергени буддизмниӊ ыдыктыг чүүлдерин аӊаа шыгжаар.
Хүрээ тудары дээрге Тываныӊ буддистеринге ханы уткалыг болгаш демниг дузалажыр үүле-херек болур. Дузалажыр дээш улустуӊ үргүлчү маӊаа кээп турарын мастерлер чугаалап турар. Дыка хөй кижилер бо төөгүлүг болуушкунга амы-хууда үлүг-хуузун киирип, сеткилиниӊ ханызындан дузалажыксап турар. Хоралыг болгаш багай салдарлыг чүүлдерден ойталаарын медерелдии-биле шиитпирлеп алган аныяк улус идепкейлиг дузалажып турарлар. Ону дыӊнаарга, өөрүнчүг-дүр.
Будда Шакьямуниниӊ өөредиин тайылбырлаар болгаш практикалаар хүрээ деп аттыг улуг хүрээ дээрге Күжүгет Шойгу аттыг культура фондузунуӊ Тываныӊ чурттакчыларынга үнелиг белектериниӊ бирээзи-дир. Өндүр улуг ажыл-херектерни кылырынга бисти сорук киирер чер ол болур дээрзинге быжыг бүзүрээр мен»
Р.Демчик белеткээн.
