Февраль 26-да Тываның Чазаанга Хөй-ниити чөвүлелиниң кежигүннери “Тываның маадырлары” регионалдыг программаны боттандырып эгелээриниң бетинде чамдык айтырыгларны сайгарып чугаалашкан. Болган хуралды Чазак Даргазы Владислав Ховалыг боду удуртуп эрттирген.
Тываның Баштыңы хуралды ажыдып тура, эрткен чылдың февральда Россияның Президентизи Владимир Путин Федералдыг чыышка Айыткалынга “Маадырлар үези” федералдыг төлевилел дугайында сагындырган. Ол төлевилелдиң кол утказы ТШО киржикчилери болгаш ооң хоочуннарынга көрдүнген тускай кадрлар программазын боттандырары болуп турар. Чурттуң Президентизиниң эгелекчи саналының соонда “Чаңгыс демниг Россия” партиязы шуулганынга аңаа дөмейлешкек программаны регионнарга эгелээрин сүмелээн. Шак ындыг программа “Тываның маадырлары” дээрзин Чазак Даргазы чугаалаан.
«Бо программаны ТШО-нуң киржикчилери болгаш хоочуннарын деткиири-биле тургускан. Мурнунда чаа сорулганы тып, боттарында бар шыдалын ажыдып, ажыглап, өзүп олурар салгалдарга үлегер-чижек болзун дээш, оларга деткиир дээн программа-дыр. Ол ышкаш программа ТШО киржикчилериниң болгаш хоочуннарының аразындан удуртукчуларны белеткээринче угланган”– деп, Владислав Ховалыг демдеглээн.
Регионалдыг бо программаны белеткеп турар үеде, организастыг комитет элээн шудургу белеткел ажылын кылып чоруткан. Март айның эгезинде төлевилелди боттандырып эгелээр.
Амгы үеде Россияның улус ажыл-агыйы болгаш күрүне албанының президент академиязы биле “Россия — арга-шинектер чурту” автономнуг коммерциялыг эвес организация-биле программаны организастаары болгаш кады ажылдажылга чорудар чөпшээрежилге чарар ажыл чоруп турар.
Программаның киржикчилери шилилгени ийи чадага эртер: бир дугаары, удавас ажылдап эгелээр интернетте албан-ёзу сайтызынга программаның шилилгезинге киржири-биле бүрүткедип алыр; ийи дугаары, амы-хууда ужуражылга үезинде тестирование эртер.
Оон аңгыда, федералдыг программага көөрде, регионалдыг программа элээн чиигелделиг болур. Бир эвес баштайгызында чүгле дээди эртемниг улус киржир болза, республика программазынга дээди болгаш ортумак тускай эртемниглерни киириштирер.
Тываның Баштыңының чугаалап турары-биле, шак ындыг шиитпир республиканың эрге-чагырга органнарынга ажылдаар удуртукчуларны белеткээринден аңгыда, тускай мергежилдиг даг-тывыш бүдүрүлгелеринге база экономиканың өске-даа адырларынга ажылдаар специалистерни белеткээр арганы бээр.
Хуралдың төнчүзүнде ооң киржикчилери программаның ылгавыр демдээн шилээш, “Тываның маадырлары” регионалдыг программа-биле өөренир улусту шилиириниң чурумун бадылап алган.
Бистиң корр.
Буян ООРЖАКТЫҢ тырттырган чуруктары.
“Шын” №8 2025 чылдың март 6