Шамбалыг суурнуң фельдшер-акушер пунктузу 1980 чылдардан тура чоокку чылдарга чедир 2 аал чурттаар бажыңның бир талазынга турган.
“ФАП-тың эрги оран-савазы турган бажыңга 1980 чылдарга чедир бодум чурттап турган мен. Ооң өске талазынга суму чагыргазы турган. Ол үеде турган пунктунуң баштайгы оран-савазының изи амгы үеде артпаан” – деп, Шамбалыгда ФАП-тың фельдшери Алимаа Ондар төөгүп берген.
Чаа туттунган ФАП 3 дугаары болуп турар. Ийи дугаар оран-савага 3 өрээлдиң бирээзинге процедура кабинеди, өскезинге сааттыг херээжен улусту хынаар, 3 дугаар өрээлге улуг-биче чонну база чиигээр херээжен кижилерни хүлээп турган.
Алимаа Ондар фельдшер эртем-билигни чедип алгаш, 1990–1993 чылдарда Кызыл хоорайга акушер болуп ажылдаан. 1993 чылдан тура амгы үеге чедир өскен-төрээн сууру Шамбалыгда фельдшер болуп ажылдап чоруур.
“Ийи эмчи чаңгыс бичии өрээлге чоннуң кандыызын-даа хүлээп ажылдап турувуста, байдал таарымча чок турган. Ол үеде компьютер-даа, интернет-даа турбаан. Чаа фельдшер-акушер пунктузун ажыдыптарга, чонга, бистиң боттарывыска-даа ажылдаарынга-даа эптиг байдал тургустунган. Кайывыс-даа аңгы өрээлдиг, компьютерлерлиг апарган бис. Электроннуг документилерни, отчёттарны ажылдап өөрени берген бис. Ол ышкаш ФАП-ты амгы үениң негелделеринге дүүштүр бүрүнү-биле чүмнээни кончуг эки. Чаа оран-савага көжүп келиривиске, ажылдаары-даа чиик апарган” – деп, Алимаа Ондар чугаалаан.
Эрги ФАП-тың оран-савазы суурнуң кыдыынга турда, ынаар кижилер шоолуг келбес, ыраксынар турганын база ол демдеглээн. Ам суурнуң ортузунга кээрге, улуг-биче чон ФАП-тың чанындан эртип бар чыткаш, орук ара кире дүшкеш, хынадып, арга-сүмени ап турар апарган. ФАП-тың баазазында аптеканы тургусканы база чонга кончуг ажыктыг. Ында чонга садар эмнер доктаамал бар. Амгы үеде ФАП-та фельдшер, акушер, санитарка үжелээн ажылдап турар.
Чыжыргана СААЯ.
Буян ООРЖАКТЫҢ тырттырган чуруктары.
"Шын" №5 2024 чылдың январь 24
