Тываның Баштыңы Владислав Ховалыг биле «Эльбрусметалл-литий» компанияның удуртулгазы база «Ростех» күрүне корпорациязының төлээлери аразында кадрлар белеткелиниң айтырыын чугаалашкан. Ужуражылга Москвада республиканың бүрүн эргелиг төлээ чериниң бажыңынга болуп эрткен. Бирги чадада ол дээрге Тываның девискээринде “Ростехтиң” боттандырып турары ийи даг-болбаазырадылга төлевилелинге бирги ээлчегде специалистерни белеткээри болур.
Ужуражылгага, ылаңгыя, корпорацияның активинче кирген Ак-Сугнуң чес-порфир болгаш Тастыг литий чыдыннарын шиңгээдирин чугаалашкан. «Даг-болбаазырадылга төлевилелдерин боттандырары биске чаа салгалдың инженерлерин белеткээр арганы бээр. Бо ажылды эгелеп алган бис. «Ростех» академиязының өөредилге шөлдерин, ол ышкаш чурттуң шыырак дээди өөредилге черлериниң аргаларын ажыглаар бис» – деп, Владислав Ховалыг дугуржулга-биле чедип алган чүүлдерни чугаалаан.
Республика Баштыңының тускай шериг операциязының хоочуннарын академияже мурнады хүлээр дугайында ооң саналынга «Ростех» компанияның төлээлери чөпшээрешкенин демдеглээн. Кадрлар курлавырын тургузарынга, оларны катап белеткээринге болгаш мергежилин бедидеринге бүгү-ле деткимчени бээрин аазаан.
«Ростех» академиязы 2017 чылда күрүне корпорациязынга болгаш бедик технологиялыг продукция-биле ажылдыг өске-даа организацияларга специалистер белеткээр болгаш мергежил бедидер өөредилге төвү кылдыр тургустунган. Ол чаңчылчаан дээди өөредилге черлеринден ылгалдыг, чүге дизе ында тускай бүдүрүлгелерниң, бирги ээлчегде камгалал үлетпүрүнүң айтырыгларын шиитпирлээринче угланган өөредилгени болгаш практиктиг ажылды каттыштырып турар.
Академияның программалары, бир дугаарында, ындыг бүдүрүлгелерниң удуртукчуларынга болгаш инженер-техниктиг мергежилдерлиг ажылдакчыларга таарыштыр тургустунган.
Бистиң корр.
Чуруктарны интернет четкизинден хоолгалаан.
“Шын” №6 2025 чылдың февраль 20
