Тываның В.Көк-оол аттыг Национал театрының сценазынга база бир солун шии үнер дээрзи манаттынып турар.
Бо хүннерде театрның артистери “Тын!” деп шиини белеткеп кирипкен.
Ол шииниң автору В.Көк-оол аттыг Национал театрның чогаал-шии килдизиниң удуртукчузу Виктория Хомушку. 2020 чылда Анастация Букреева биле Константин Федровтуң удуртулгазы-биле “Тываның эгелеп чоруур авторларынга лаборатория” деп төлевилелге ол киржип турган. Виктория Викторовна ынчан орус дылга "Живи" деп шиини бижээш, багай эвес үнелелди алган. 2021 чылда аңгы-аңгы чергелиг драматургтар мөөрейлеринге киришкеш, чижээ, «Исходное событие — XXI ВЕК» деп V-ки Улустар аразының амгы үениң драматургиязының хамаарышпас мөөрейиниң «Маленький принц» деп номинациязынче кордакчыларның кыска даңзызынче, «Ремарка-2022» деп Улустар аразының чаа драматургия мөөрейиниң «Маленькая ремарка. Пьесы 12+» номинациязынче кордакчыларның узун даңзызынче кирген.
Тыва сценага көргүзери-биле белеткеп турар Виктория Хомушкунуң шиизиниң очулгазын Эрес Кол кылган. Режиссеру- театрның кол режиссеру Сайдаш Монгуш.
Апрель 27-де көрүкчүже бир дугаар үнер деп турар шииде колдуунда аныяктарның нарын айтырыглары, назы четпээн уругларның аразында хамаарылгазы, чааскаанзырал, ада-ие болгаш ажы-төл аразында билишпес чорук база чуртталганың үнелелдериниң дугайында көргүзүп турар. Шииниң кол маадырлары Оксана биле Ника кайызы-даа нарын-берге дөмей байдалдарга таваржы бергеш, ону кады шиитпирлээрин оралдажып турар...
Чаа шииде Тываның Улустуң артизи Анзат Куулар, Тываның алдарлыг артистери Мерген Хомушку, Надежда Ооржак, Елена Ооржак болгаш аныяк артистер - Салбак Лапчар, Надежда Салчак, Хемермаа Сайзан-оол, Чылгычы Даваа киржип турар.
В.Көк-оол аттыг Национал театрның медээзи-биле.
