РФ-тиң Президентизиниң Сибирь федералдыг округунда бүрүн эргелиг төлээзи Анатолий Серышев Тыва Республикага ажыл-агыйжы сургакчылаашкынының үезинде Кызыл хоорайның социал албан черлеринге болгаш бүдүрүлге объектилеринге четкен.
Президентиниң бүрүн эргелиг төлээзи баштай чоокта чаа ажыттынган 19 дугаарлыг «ПрофЛидер» школага барган. 825 олуттуг школа «Өөредилге» национал төлевилелдиң “Уруг бүрүзүнүң чедиишкини” федералдыг программаның деткимчези-биле туттунган.
Ук өөредилге албан чери профиль аайы-биле беш аңгы угланыышкынныг өөредилгени чорудуп турар: гуманитарлыг профиль — башкылар болгаш журналистер класстары; физика-математикага — IТ-класстар; бойдус-эртемге — эмчилер клазы, ол ышкаш бизнестиң үндезиннеринге өөредир социал-экономиктиг класстар база автодело, тудуг, аъш-чем кылырының технологиялары дээш өске-даа бүгү талалыг (универсалдыг) класстар бар.
Кичээлдээр кабинет бүрүзүн профильдиг эртемнерге өөредир эргежок чугула шупту дериг-херекселдер-биле чүмнээн. Школада кичээлдээр кабинеттер биле лабораторийлерден аңгыда, ийи спорт залы, столовая база библиотека бар. Анатолий Серышев школада өөреникчилерниң мергежил шилип алыр талазы-биле боттандырып турар төлевилелдеринге эки үнелелди берген. «Россияның Президентизи бистиң чуртуң ажы-төлүнге шынарлыг билиг чедип алырынга шупту аргалар турар ужурлуг деп чаңгыс эвес удаа чугаалап турган. Бөгүн барган школавыс ол аргаларның эки үлегери- дир» — деп, А. Серышев чугаалаан.
Ол ышкаш бүрүн эргелиг төлээ «БТК-групп» дааранылга бүдүрүлгезиниң ажыл-ижи-биле база танышкан. Ук бүдүрүлге регионда 2017 чылдан тура ажылын эгелээн. Амгы үеде ында ийи дааранылга цехтери ажылдап турар. Бүдүрүлгениң ажыл- агыйын улгаттырар сорулга-биле чаа фабрика тудуунуң төлевилелин ажылдап кылып турар.
Республиканың Чазааның экономиктиг блогунуң төлээлери биле бүдүрүлгениң удуртулгазының ужуражылгазының үезинде инвестиция күжүн боттандырар айтырыгларны чугаалашкан.
Кызыл хоорайга Анатолий Серышев Москва облазынга «Крокус Сити Холлдуң» концерт залынга болган террорисчи актыга когарааннарга сактыышкын мемориалынга чечектер салыр ёзулалды кылган. Чайгаар бүткен мемориалды найысылалдың «Южный» микрорайонунда Москва хоорайга тураскааткан артобъектиде тургускан. Тываның чурттакчылары айыыл-халаптан когарааннарга кажыыдалын илередип чечектер болгаш ойнаарактар салып, чулаларны кыпсып турар.
Президентиниң бүрүн эргелиг төлээзи Россияда эң-не улуг «Түбтен Шедруб Линг» сарыг шажын хүрээзин база көрүп четкен. Хүрээниң ниити шөлү 9,3 гектар. Эрткен чылын ажыттынган улуг хүрээ чүгле регионнуң эвес, бүгү чурттуң культурлуг болгаш өөредилгелиг эң-не кол сарыг шажын төвү болган.
Бистиң корр.
Чиңгис СААЯНЫҢ тырттырган чуруктары
"Шын" №23 2024 чылдың март 27.
