БИР ДУГААР ТӨЛ
2024 чыл үнүп келирге, бир-ле дугаарында 3900 гр. кыс уруг 00:01 шакта Перинаталдыг төпке төрүттүнген.
Тывага 2024 чылдың эң-не баштайгы төлү Орлан биле Чойгананың өг-бүлезиниң 4 дугаар уруу болган. Өг-бүле чаа төрүттүнген кызын Чиңгис-Хаанның авазының ады-биле Оэлун деп адаан.
Чаңчыл езугаар ТР-ниң Баштыңы Владислав Ховалыг чаа төрүттүнген чашка болгаш ооң авазынга байыр чедиргеш, авашкыларга бичии орунну болгаш колясканы белекке берген.
«Авашкыларның кадыының байдалы эки болду. Федералдыг төптүң деткимчези-биле республикага амгы үениң дериг-херексели-биле дерээн эмнелге оран-саваларын тудуп алыр аргалыг болганывыска өөрүп тур мен. Президентивис Владимир Путин быжыг болгаш хөй ажы-төлдүг өг-бүлелерниң чуртка чугулазын бо-ла демдеглеп чугаалаар кижи» – деп, Владислав Ховалыг бодунуң блогунга демдеглээн.
Оон аңгыда Владислав Ховалыг РФ-тиң кадык камгалалының удуртулгазы-биле Тываның Перинаталдыг төвүнге немей чаа оран-сава тудар дугайында чугаалашкан дээрзин демдеглээри чугула.
Тываның перинаталдыг төвүнүң улуг эмчизиниң оралакчызы Тайгана Лапчааның медеглээни-биле алырга, ийи дугаарында 00:20 минута турда, 4200 гр. деңзилиг оол ада-иезиниң алды дугаар төлү болуп төрүттүнген.
«2024 чыл үнүп келирге-ле, бир шак дургузунда беш опея төрүттүнген. Оларның үжү оол, а ийизи кыс болган. Оон ыңай декабрь 26-да 3550 гр. деңзилиг төрүттүнген дун оолду бөгүн эмнелгеден үндүр бижээн. Ооң ада-иези кайызы-даа студентилер болган» – деп, Тайгана Лапчаа чугаалаан.
ТР-ниң орук-транспорт яамызының ажылдакчылары 2024 чылдың январь 1-де эмнелгеден үнген авашкыларга автомобильге чоруурда ажыглаар тускай креслону белекке берген.
А.ОНДАР белеткээн.
Чуруктарны интернет четкизинден алган.
