Россияның Президентизиниң Чарлыы ёзугаар Тываның иштики херектер сайыдынга полицияның генерал-майору Юрий Завьяловту томуйлаан. Видео-харылзаа таварыштыр болган хуралга РФ-тиң иштики херектер сайыдының хүлээлгезин түр үеде күүседип турар Игорь Зубов ИХЯ-ның хуу составынга өске томуйлаттырганнар-биле кады ону таныштырган. Видео харылзаалыг хуралга Тывадан ТР-ниң Чазак Даргазының оралакчызының хүлээлгезин түр үеде күүседип турар Уран-оол Ондар киришкен.
Тывага томуйладырының мурнунда Юрий Завьялов РФ-тиң ИХЯ-ның Красноярск край талазы-биле кол эргелелиниң начальнигиниң оралакчызы албан-дужаалды ээлеп турган. Ол ажыл-чорудулгазын бодунуң төрээн Владимир облазындан эгелээн, оон Коми Республиканың иштики херектер органнарынга, Камчатск крайга албан хүлээлгезин эрттирип турган. 2020 чылда РФ-тиң ИХЯ-ның Красноярск край талазы-биле кол эргелелиниң начальнигиниң оралакчызы — Красноярск крайның полициязының начальниги албан-дужаалга томуйлаткан.
Юрий Завьялов — дайын хөделиишкиннериниң хоочуну, күрүне болгаш ведомстволар шаңналдарының эдилекчизи. Шаңналдарының аразында «Эрес-дидим чорук» ордени, «Ада-чурт мурнунга ачы-хавыяазы» орденниң II чергениң медалы, «Хөй-ниити чурумунуң камгалалынга шылгарал дээш», «Эрес-дидим чорук дээш» деп медальдар, «Ажыл-албанынга шылгарал дээш» 3 чадазы, «Дайынчы эп-найырал дээш» деп Россияның ИХЯ-ның медальдары бар.
Игорь Зубов чаа удуртукчулардан шериг кезектерин четчелээрин өстүрер талазы-биле ажылдарны күштелдирерин, кадрлар-биле ажылды системажыдарын негээн, ол ышкаш IT-технологиялар ажыглап, криминалдыг семээшкиннерни болдурбазынче болгаш соксадырынче кичээнгейни салырын онзалап демдеглээн.
Бир харыысалгалыг угланыышкын — миграциялыг байдалдар-биле харылзаалыг айтырыглар. Эң-не шыңгыы кичээнгейни орук шимчээшкининиң айыыл чок чоруун хандырарынче, эзирик чолаачылар-биле демиселче, ол ышкаш элээдилерниң кем-херек үүлгедиишкининиң өзүлдезин өөренип көргеш, назы четпээннер-биле ажылче угландырары чугула.
Юрий Завьяловтуң мурнунда Тываның Иштики херектер яамызын полицияның генерал-майору Сергей Кондрашов удуртуп турган.
ТР-ниң Чазааның медээзинден.
“Шын” №26 2025 чылдың июль 10